Ամերիկացի և կանադացի օվկիանոսագետները Կալիֆոռնիա նահանգի ափամերձ ջրերում հայտնաբերել են սպիտակ կետի, որը կարող է կրկնօրինակել մարդու ձայները: Այս մասին տեղեկացվում է Current Biology ամսագրում:
«Մեր հետազոտությունները ցույց են տվել, որ կետը ստիպված է եղել փոխել իր ձայնային հանգույցները, որպեսզի մարդու խոսքին նմանվող ձայներ հանի: Նման ակնհայտ ջանքերը խոսում են այն մասին, որ կետը ցանկացել է կապ հաստատել մեզ հետ»,- ասել է օվկիանոսագետների խմբի ղեկավար Սեմ Ռիջուեյը:
Ռիջուեյը և նրա գործընկերները հետևել ենՍան Դիեգոյի շրջակայքի ջրային տարածքում ապրող մի քանի դելֆինների և սպիտակ կետերի կյանքին: Օվկիանոսագետներն ամեն օր ուսումնասիրել են նրանց վարքը և անհատական առանձնահատկությունները: Նման մի օր խմբի անդամներից մեկը ջրի մեջ լսել է անսպասելի հրահանգ՝ «դուրս լողա»: Երբ նա դուրս է եկել ջրի մակերևույթ և հարցրել, թե ով նման բան խնդրեց, նրա գործընկերները խիստ զարմացել են:
Հոդվածի հեղինակները ենթադրել են, որ «հրամանն» արձակել են ավազանի կետերը: Այս չափազանց տարօրինակ հիպոթեզն առաջացել է շնորհիվ այն բանի, որ դեռ 1984 թ. Ռիջուեյը և նրա գործընկերները դելֆինների և կետերի ակվարիումում տարօրինակ ձայներ էին լսել, որոնք նրանց հիշեցրել էին երկու մարդու հեռավոր և խուլ երկխոսություն:
Կենսաբանները մի շարք հետազոտություններ են անցկացրել և պարզել, որ տարօրինակ ձայն արձակողը եղել է NOC մականունով կետը: Այդ կետը 7 տարի մյուս կետերի և դելֆինների հետ ապրել է այն ակվարիումում, որի մեջ հաճախակի էին սուզվում հետազոտողները և փորձարկում ստորջրյա կապը:
Հետազոտողները ձայնագրել են NOC-ի արձակած ձայները և վերլուծել դրանք համակարգչային ծրագրերի միջոցով՝ համեմատելով մարդկային խոսքի հետ: Ի զարմանս իրենց՝ օվկիանոսագետները պարզել են, որ դրանք առավել նման են մարդկային խոսքի, քան այն ձայներին, որոնք սովորաբար կետերն արձակում են միմյանց հետ հաղորդակցվելիս:
Գիտնականները նշում են, որ մարդկային խոսքի այդպիսի իմիտացիան չափազանց բարդ առաջադրանք է կետերի համար, քանի որ, ի տարբերություն մարդու, կետերը ձայնի մշակման համար օգտագործում են իրենց քիթը և ոչ թե ձայնային հանգույցները:
