Լիբանանում պոռթկումները և հուզումները շարունակվում են. ընդդիմությունը պահանջում է Լիբանանի վարչապետ Նեժիպ Միքաթիի հրաժարականը: Այսօր «Առաջին լրատվական»-ի հետ զրույցում այս մասին ասաց «Արարատ» պաշտոնաթերթի գլխավոր խմբագիր Ահարոն Շխրտմյանը՝ խոսելով Լիբանանում ստեղծված իրավիճակի շուրջ:
Նրա խոսքով՝ Բեյրութում հատկապես լարված է եղել դրությունը երեկ, երբ տեղի է ունեցել երկու օր առաջ Բեյրութի քրիստոնեական թաղամասերից մեկի պայթյունի զոհ դարձած Լիբանանի ներքին անվտանգության ուժերի տեղեկատվության վարչության տնօրեն Ուիսամ Հասանի հուղարկավորության արարողությունը, որին մասնակցել են Լիբանանի նախագահը, վարչապետը և այլ պաշտոնյաներ:
«Նախագահը խստիվ դատապարտեց տեղի ունեցածը և իրավական մարմիններից պահանջեց բացահայտել հանցագործների ինքնությունը, վարչապետ Միքաթին ևս դատապարտեց ոճիրը և պահանջեց, որ հանցագործները հայտնաբերվեն: Հուղարկավորությունից հետո ընդդիմադիրները փորձեցին մուտք գործել կառավարության շենք կառավարությունը տապալելու նպատակով, սակայն բանակը կարողացավ այնպես անել, որ խռովարարները մուտք չգործեն կառավարության շենք և հաջողությամբ կասեցրեց նրանց մտադրությունը: Այս ամենի արդյուքնում տասնյակ մարդիկ տեղափոխվեցին հիվանդանոց: Ընդդիմության ներկայացուցիչ Սաադ Հարիրին հայտարարեց, որ իրենք չեն ցանկանում բռնությամբ տապալել կառավարությունը, այլ պետք է շարունակեն իրենց պայքարը տարբեր քաղաքական ձևերով, սակայն ընդդիմությունը շարունակում է բարձրացնել պահանջը. այն է՝ վարչապետի հրաժարականը»,- մանրամասնեց լիբանանահայը՝ շարունակելով, որ բավական երկար ժամանակ արվարձաններում ևս բախումներ են ծավալվել ընդդիմադիրների և բանակի միջև: Սակայն, Շխրտմյանի հավաստիացմամբ, առավոտյան կանուխ ժամերին բանակը, անվտանգության ուժերը իրենց տիրապետության տակ վերցրին մայրաքաղաքի գլխավոր արվարձանները:
Եզրափակելով իր խոսքը՝ «Արարատ» պաշտոնաթերթի գլխավոր խմբագիրն ասաց, որ ընդհանրապես երկրում լարված կացություն է տիրում հատկապես Լիբանանի հյուսիսում՝ Տրիպոլի քաղաքում, որտեղ սուննի համայնքը մեծամասնություն է կազմում, այնտեղ է ապրում վարչապետ Միքաթին: «Նրա տան առջև նստացույց է հայտարարվել ընդդիմության կողմից, որպեսզի նա հրաժարական ներկայացնի: Այդ պոռթկումները և հուզումները շարունակվում են»,- ընդգծեց Ահարոն Շխրտմյանը:
Հիշեցնենք, որ մի քանի օր առաջ՝ կեսօրին, Բեյրութի քրիստոնեական Էշրէֆիէի շրջանում հզոր պայթյուն էր որոտացել, վիրավորվել էին բազմաթիվ մարդիկ, իսկ 8 մարդ զոհվել էր, որոնց թվում Լիբանանի «Մարտի 14»-յան ուժերի ներկայացուցիչ Սաադ Հարիրիի մտերիմ, Ներքին անվտանգության ուժերի տեղեկատվության վարչության տնօրեն Ուիսամ Հասանը:
