ՀՀ փոխվարչապետ, տարածքային կառավարման նախարար Արմեն Գևորգյանն այսօր` հոկտեմբերի 20-ին Կոտայքի մարզպետարանում մասնակցել է մարզխորհրդի նիստին, որի օրակարգում էին սեփական եկամուտների հավաքագրման, մարզում իրականացվող ծրագրերի ընթացքին վերաբերող և հրատապ այլ հարցեր:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, թե ընթացիկ տարվա հոկտեմբերի 1-ի դրությամբ Կոտայքի մարզի համայնքների բյուջեների փաստացի մուտքերը նախատեսված շուրջ 3, 6 մլրդ դրամի դիմաց կազմել են 3,5 մլրդ դրամ, կատարողականը 98.4% է: Սեփական եկամուտների կատարողականը (5 հարկատեսակների գծով) կազմել է 96.1 %: Հինգ հարկատեսակների մասով կատարողականի 70 %-ից ցածր ցուցանիշներ են արձանագրվել միայն տասը համայնքում:
Փոխվարչապետն ընդհանուր առմամբ բավարար է համարել մարզի համայնքներում սեփական եկամուտների հավաքագրման տեմպերը` վստահություն հայտնելով, որ համեմատաբար ցածր ցուցանիշներ ունեցող համայնքներն առաջիկա ամիսներին առավել հետևողական աշխատանքներ կիրականացնեն այդ ուղղությամբ: Կարևորելով արդյունավետ վարչարարության իրականացումը` նա ևս մեկ անգամ ընդգծեց, որ այդ հանգամանքը հաշվի է առնվելու պետության կողմից համայնքներում ծրագրերի իրականացման դեպքում:
Մարզերի առաջնահերթ խնդիրների լուծման երրորդ ծրագրի առնչությամբ զեկուցվել է, որ արդեն կատարվել է նախատեսված աշխատանքների 94,6 տոկոսը: Քննարկվեցին նաև չորրորդ ծրագրի մեկնարկին վերաբերող հարցեր, որով մարզին տրամադրվել է 1,3 մլրդ դրամ: Միջոցները հիմնականում կուղղվեն դպրոցների, շենքերի տանիքների, ներհամայնքային ճանապարհների նորոգմանը, ոռոգման ջրագծերի կառուցմանը:
Նիստի ընթացքում տեղեկություններ են ներկայացվել մարզում հողօգտագործողներին մատչելի գնով պարարտանյութ և դիզելային վառելանյութ տրամադրելու պետական ծրագրերի ընթացքի, առաջին վերարտադրության ցորենի սերմացուի հավաքագրման գործընթացի մասին: Փոխվարչապետը համայնքապետերին հորդորել է հետևողական լինել ստանձնած պարտավորությունների իրականացման հարցում:
Ա. Գևորգյանը պարզաբանումներ է ներկայացրել նաև համայնքապետերի բարձրացրած հարցերի վերաբերյալ:
