Ներկա սոցիալ-տնտեսական, քաղաքական իրավիճակում յուրաքանչյուր ուժ փորձում է սեփական ամբիցիաներն արտահայտել ու սեփական թեկնածուներն առաջադրել՝ դրանով իսկ օգնելով գործող ռեժիմին: Միայն համախմբված կերպով, ժողովրդին առաջնորդելով է հնարավոր փտած ծառը տեղից շարժել ու վայր գցել: Այս մասին այսօր «Առաջին լրատվական»-ի հետ զրույցում ասաց Հայ ազգային կոնգրեսին մաս կազմող` «Հայրենիք ու պատիվ» կուսակցության նախագահ Գառնիկ Մարգարյանը՝ անդրադառնալով գալիք նախագահական ընտրություններին:
Նա նշեց, որ ՀՀ բնակչությունը վաղուց գիտի` երկրում արդար ընտրություն չկա և չի էլ լինելու: Ըստ նրա՝ ստեղծված է մի մեխանիզմ, որը հակաժողովրդական է, հակազգային և իր մեջ լուրջ վտանգներ է պարունակում:
Անդրադառնալով այն խոսակցություններին, թե նախագահական ընտրություններին ՀԱԿ-ը կպաշտպանի ԲՀԿ թեկնածուին, Գառնիկ Մարգարյանն ասաց` եթե Լևոն Տեր-Պետրոսյանը որոշի առաջադրվել, պետք է հստակ հայտնի իր անելիքների մասին:
«Առաջադրման դեպքում Լևոն Տեր-Պետրոսյանը իր անելիքների մասին պետք է ասի, քանի որ փոխվել են ժամանակները` 2008 թվականը չէ, այժմ տնտեսական, քաղաքական կյանքում փոխվել է ներքին, արտաքին իրավիճակը: Բազմաթիվ փոփոխություններ են տեղի ունեցել. մենք դա պետք է հաշվի առնենք:
Երկրորդը՝ եթե ԼՏՊ-ն չառաջադրվի, ապա ԲՀԿ որևիցե թեկնածուի պաշտպանելու դեպքում մեր կուսակցությունը ՀԱԿ-ում անելիք չի ունենա, քանի որ ԲՀԿ-ն Ռոբերտ Քոչարյանի և Սերժ Սարգսյանի հենարանն է: Նրանք ժողովրդին չնչին բան են գցում` լինի օգնություն, բարերարություն, թե մի ուրիշ բան: Ո՞վ ասաց, որ ԲՀԿ-ն փրկիչ է, իսկ մենք նրանց թեկնածուին պետք է աջակցենք. դա նույն ռեժիմն է»,- հայտնեց Գառնիկ Մարգարյանը՝ ընդգծելով, որ սա է «Հայրենիք ու պատիվ» կուսակցության դիրքորոշումը:
