Սիրիայում ընդդիմության և իշխանության զոհերի թիվը հասել է 30 հազարի: Այս մասին այսօր հայտարարել է ՄԱԿ գլխավոր քարտուղարի քաղաքական հարցերով տեղակալ Ջեֆրի Ֆելթմանը, հաղորդում են միջազգային ԶԼՄ-ները:
«Սիրիայում հակամարտությունը շարունակում է մեծանալ, զոհերի թիվը հասել է 30 հազարի»,-հայտարարել է նա ԱԽ նիստի ժամանակ՝ նվիրված Մերձավոր Արևելքի իրավիճակին: Ֆելտմանի խոսքերով՝ արաբական երկրում իրադրությունը խոսում է այն մասին, որ ճգնաժամը «չունի ռազմական լուծում»: «Մենք հակված ենք հակամարտության խաղաղ լուծմանը»,-հայտարարել է նա:
Ջեֆրի Ֆելտմանը մատնանշել է աճող սպառնալիքը, որը տարածաշրջանի համար իրենից ներկայացնում է Սիրիայում իրադրության վատթարացումը: Նա հիշեցրել է թուրքական տարածքի ռմբակոծությունների միջադեպի մասին, ինչն էլ հանգեցրել է Անկարայի և Դամասկոսի հարաբերությունների վատթարացմանը:
Նախորդ շաբաթ Դամասկոսը մերժել է ՄԱԿ գլխավոր քարտուղար Պան Գի Մունի` միակողմանի կրակը դադարեցնելու կոչը, հիշեցնելով, որ սիրիական կառավարությունն արդեն երկու անգամ դիմել է այդ քայլին, երբ երկրում էին գտնվում ԱՊԼ դիտորդները և ապրիլի 12-ին՝ ԱԽ հաշտության բանաձևի համաձայն: Սակայն, ինչպես նշել է հանրապետության ԱԳՆ, երկու անգամն էլ ընդդիմության գրոհայիններն առիթն օգտագործեցին իրենց հանցագործություններն իրականացնելու համար:
