Սիրիայի հարցով ՄԱԿ-ի և ԱՊԼ հատուկ բանագնաց Լահդար Բրահիմին այսօր կայցելի Թուրքիա, որտեղ բանակցություններ կվարի արտգործնախարար Ահմեդ Դավութօղլուի հետ: Այս մասին տեղեկացնում է «Ազատություն» ռադիոկայանը:
Բրահիմին շարունակում է բանակցությունները Սիրիայի հարևան պետությունների հետ՝ որոնելու սիրիական հակամարտության հաղթահարման ճանապարհներ: Բրահիմին այս շաբաթ այցելել էր նաև Սաուդյան Արաբիա, որը բացահայտ աջակցում է Սիրիայի նախագահ Բաշար Ասադի ռեժիմի ընդդիմությանը:
Սիրիայի ու Թուրքիայի միջև հարաբերությունները, որոնք առանց այդ էլ լարված են, վերջին շրջանում սրվել են սիրիական տարածքից թուրքական բնակավայրի վրա հրաձգության դեպքերից և Անկարայի օդանավակայանում Մոսկվա-Դամասկոս ինքնաթիռի պարտադրված վայրէջքից հետո, որից, ինչպես պնդում են թուրքական իշխանությունները, առգրավել են ռազմական նշանակության արտադրանք:
Սիրիան իր հերթին Անկարային մեղադրում է «թշնամական գործողությունների մեջ»: Կատարվածից դժգոհություն էր հայտնել նաև Ռուսաստանը. ՌԴ արտգործնախարար Սերգեյ Լավրովը հայտարարել էր, որ ինքնաթիռում եղել են տեղորոշիչ կայանի համար նախատեսված սարքեր, որոնց տեղափոխումը համապատասխանում է քաղաքացիական ավիացիայի ոլորտում միջազգային համաձայնագրին:
