«Հրապարակ»-ը գրում է, որ ոստիկաններին դիմադրություն ցույց տալու համար վեց տարվա ազատազրկման դատապարտված ՀԱԿ անդամ Տիգրան Առաքելյանը, տեղեկանալով, որ ԱՄՆ դեսպանը մտահոգություն է հայտնել Վարդան Օսկանյանի գործի կապակցությամբ, երեկ նամակ է հղել ԱՄՆ դեսպանին և մի քանի տրամաբանական հարց ուղղել նրան: «Պարոն դեսպան. 1. Ովքե՞ր են դիմել Ձեզ, և արդյո՞ք ես իրավունք ունեմ իմ և նույն դատավճռով ազատազրկման դատապարտված իմ ընկերների անունից դիմել Ձեզ և ակնկալել Ձեր դիրքորոշումը: Մեր նկատմամբ կատարվել են բռնություններ, և շինծու մեղադրանքների արդյունքում դատապարտվել ենք 2-6 տարվա ազատազրկման: 2. Պարոն դեսպան, չմեկնաբանելով և որևէ դիրքորոշում չհայտնելով մեզ առնչվող հանրահայտ դատավարությանը, չե՞ք կարծում, որ դա վատ է ԱՄՆ-ի և իր ներկայացուցչության հեղինակության համար հենց արդարադատության և ժողովրդավարության ընտրովի մեկնաբանման տեսակետից: 3. Արդյո՞ք անհանգստացնող չէ այս դատավճիռը ընտրություններից առաջ: 4. Պարոն դեսպան, եթե դիրքորոշում հայտնելու համար բավարար տեղեկատվության չեք տիրապետում, առաջարկում եմ Ձեզ կամ Ձեր ներկայացուցչին` հանդիպել ինձ»:
«Իսկապես` եթե ամերիկյան դիվանագետի հետաքրքրությունը պայմանավորված է Հայաստանում տեղի ունեցող ոչ դեմոկրատական գործընթացների հետ կապված անհանգստությամբ, ինչո՞ւ է դա տարածվում միայն Վարդան Օսկանյանի նկատմամբ: Ինչո՞ւ նրանց համար ուշագրավ չէ ՀԱԿ երիտասարդների գործը, որոնցից մեկն արդեն մեկ տարի կալանքի տակ է, իսկ դատավարությունը երկար ամիսներ է ձգվում: Եթե իսկապես սա քաղաքական միջամտություն չէ ԱՄՆ գերտերության կողմից Հայաստանի ներքին գործերին, ապա ինչո՞ւ դեսպանը հայտարարություններ չի անում ոչ միայն ՀԱԿ երիտասարդների, այլև մյուս շարքային գործերով, որտեղ ոտնահարվում է օրենքը»,- հավելում է «Հրապարակ»-ը:
