Վատիկանի գաղտնի փաստաթղթերի հափշտակման գործով վճիռը կարձակվի եկող շաբաթվա վերջին, տեղեկացնում է KAI գործակալությունը: Հաջորդ շաբաթ չորս նիստ է նշանակված, և դրանք բավարար կլինեն վճիռ կայացնելու համար»,- նշել է Վատիկանի դատարանի նախագահ Ջուզեպպե Դալլա Տորրեն:
Հռոմի պապի նախկին անձնական սպասավորի դեմ դատալսումները սկսվել է շաբաթ օրը: Նիստը տևել է ավելի քան երկու ժամ: Հաջորդ նիստը նշանակված է երեքշաբթի:
Պապի անձնական սպասավոր Գաբրիելեի հետ մեղադրյալի աթոռին է հայտնվել նաև Վատիկանի պետքարտուղարության ծրագրավորող Կլաուդիո Շարպելլետտին, որին մեղադրում են սպասավորին աջակցելու համար: Դատապաշտպանների միջնորդությամբ նրա գործը առանձին կքննվի:
Դատական նիստերի ընթացքում դատարանը որպես վկաներ կլսի Պապի անձնական քարտուղարին, մի քանի ժանդարմի:
Դատական նիստերին թույլատրվել է մասնակցել միայն ութ լրագրողի: Լուսանկարիչներին և հեռուստաօպերատորներին դատական նիստերի դահլիճ մտնել չի թույլատրվում:
Եթե Պապի նախկին սպասավորը մեղավոր ճանաչվի, նրան սպասվում է չորս տարվա ազատազրկում: Այդ դեպքում նրան կտեղափոխեն իտալական բանտ, քանի որ Վատիկանում բանտարկյալներին այդքան երկար պահելու հարմարություններ չկան:
Գաբրիելեն ձերբակալվել է այս տարվա մայիսի 23-ին Վատիկանի իր բնակարանում: Նրա մոտ հայտնաբերվել են Վատիկանի գաղտնի փաստաթղթեր, այդ թվում նաև Պապի անձնական նամակները, ինչպեսև փաստաթղթեր պատճենահանելու հատուկ սարքավորում: Այդ փաստաթղթերը վաղուց էին մեջբերվում իտալական թերթերում և բազմաթիվ դժվարությունների առաջ էին կանգնեցնում Վատիկանին:
Գաբրիելեի մոտ փաստաթղթերից բացի հայտնաբերվել են նաև որոշ թանկարժեք իրեր, որոնք պատկանում են Հռոմի պապ Բենեդիկտոս XVI-ին:
