Անցած տարի պետբյուջեով առողջապահության նախարարությանը հատկացվել է 66 մլրդ 640 մլն դրամ, որը կատարվել է 95.6%-ով: Ինչպես այսօր Ազգային ժողովի առողջապահության, մայրության և մանկության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում տեղեկացրեց ՀՀ ֆինանսների նախարարի տեղակալ, գլխավոր գանձապետ Ատոմ Ջանջուղազյանը, 4.1 մլրդ դրամը (կատարողականը՝ 96.4%) նախատեսված է եղել բուժսարքավորումների ձեռքբերման համար, արտահիվանդանոցային ծախսերը՝ 27 մլրդ (կատարողականը՝ 99.6%), հիվանդանոցային ծախսերը՝ 27.2 մլրդ (կատարողականը՝ 99.2%) և այլն:
ՀՀ առողջապահության նախարար Դերենիկ Դումանյանը հայտնեց, որ ՀՀ-ում մեկ հիվանդի համար ծախսվում է 19.3 հազ. դրամ, Ռուսաստանում՝ 130 հազ. դրամ, Էստոնիայում՝ 100 հազ. դրամ, իսկ եվրոպական զարգացած երկրներում՝ շատ ավելի:
Դումանյանի խոսքով, առաջնային առողջության պահպանման ծախսերը հաշվարկում են ըստ մարդաքանակի, ըստ այդմ՝ 35%-ը բնակվում է Երևանում, սակայն ստացիոնար ծառայության 70%-ը կատարվել է Երևանում, ինչը նշանակում է, որ մարզերում բուժհիմնարկների վիճակը լավ չէ։
«Մարզային հիվանդանոցների վիճակը այնքան էլ լավ չէ, և արհեստական հոսք է նկատվել մարզերից դեպի Երևան: Շատ մարզերում հիվանդանոցների հագեցվածությունը, սպասարկումը չի զիջում մայրաքաղաքին, բայց հոսքը նկատվում է»,- ասաց Դումանյանը՝ հավելելով, որ վերջին տարիներին ծննդօգնության սերտիֆիկատի ներդրումից հետո չսահմանափակվեց տարածաշրջանը, և ծնունդների 31%-ն անցած տարի մարզերում է եղել, 2012 թ. այդ ցուցանիշը դարձել է 36%: Ըստ նախարարի՝ սա շատ անհանագստացնող է, որովհետև ժամանակ կգա, որ մենք մարզերում խնդիր կունենաք: Օրինակ՝ Բերդում կա մեկ գինեկոլոգ, Վայքում՝ մեկ անեստեզիոլոգ, ինչը մեծ խնդիրներ է առաջացնում:
Դումանյանը նշեց, որ ֆինանսական միջոցների անհավասար բաշխումով հիվանդների հոսքը բերվել է դեպի Երևան:
