Ալյասկայի համաճարակաբանները հայտնաբերել են մալարիայով վարակված թռչուններ: Սան Ֆրանցիսկոյի համալսարանի կենսաբան Ռավինդեր Սեգալը պարզել է, որ ինֆեկցիայի կրող են հանդիսացել չվող թռչունները: Դա խոսում է գլոբալ տաքացման մասին, ինչն անհանգստացնում է գիտնականներին: Այս մասին հաղորդում է Reuters գործակալությունը:
Բնապահպանների խոսքով՝ եթե կլիման շարունակի փոփոխվել, ապա մակաբույծը հեշտությամբ կհաստատվի Ալյասկայում և կտարածվի մոծակների միջոցով: Անցած տարի գիտնակններն ուսումնասիրման նպատակով արյուն են հավաքել թռչուններից Անկորիջ, Ֆերբենքս և Քոլդֆուտ քաղաքներում: Հետազոտողները մալարիա էին հայտնաբերել Անկորիջում և Ֆերբենքսում: Հետազոտման ենթարկված 676 թռչունից վարակված է եղել 7,2 տոկոսը: Ինֆեկցիան հանդիպել է հիմնականում սևագլուխ երաշտահավերի մոտ:
Ներկայում անցկացվում է հավելյալ հետազոտություն, որը պետք է ցույց տա, թե կոնկրետ որ տեսակի մոծակն է տարածում վիրուսը: Դեռևս հայտնի չէ նաև, թե ինչպիսի հետևանք կունենա մալարիան տեղի թռչունների պոպուլյացիայի վրա: Օրինակ՝ պինգվինները մալարիայի դեմ իմունիտետ չունեն, հիվանդությունը նրանց սպառնում է մահով:
Նաև հայտնի է, որ «եկվոր մոծակները» մեծ վնաս են հասցրել Հավայան կղզիների թռչունների պոպուլյացիային:
