Այսօր Երևանի Սարյանի պուրակում Հայ ազգային կոնգրեսը կազմակերպել էր տոնական հավաք: Հանդիպմանը ելույթ է ունեցել նաև Հանրապետության առաջին նախագահ Լևոն Տեր-Պետրոսյանը: Նա, մասնավորապես ասել է.
«Այսօր մենք հավաքվել ենք նշելու անկախության տոնը: Պաշտոնական տոներ չեմ սիրում, երբ դրանք կազմակերպվում են վերևից, և խոսքեր են ասվում ու դատարկախոսություններ են հնչում: Այստեղ հավաքված են մարդիկ, որոնց ոչ ոք հարկադրված չի բերել այստեղ: Մենք ունենք անկախություն, ի պատիվ ձեզ, մեր սերնդի, մենք ենք կերտել այդ անկախությունը: Այսօր շատերը գոհ չեն մեր պետականության այն վիճակից, որով մենք այսօր ապրում ենք:
Քաղաքագիտությունը ամենապարզ գիտությունն է, որը տեսնում է երկրի առաջ կանգնած խնդիրները և լուծում դրանք:
Տեր-Պետրոսյանը նշել է, որ այսօր հինգ խնդիր է տեսնում ամուր, արժանապատիվ պետութուն դառնալու համար՝ հայ-թուրքական հարաբերությունները, Ղարաբաղի հարցը, շրջափակումների վերացումը, կոռուպցիայի արմատախիլ արվելը և օրինականության հաստատումը, ուրիշ բան պետք չէ, ուրիշ հանելուկ չկա: Լուծենք այս խնդիրները և կտեսնեք ինչպիսի պետություն կդառնա Հայաստանը:
Լևոն Տեր Պետրոսյանը նաև անդրադարձել է Սերժ Սարգսյանի կառավարությունում հրավիրված խորհրդակցությանը՝ նշելով, որ գործող նախագահը խորհրդակցություն հրավիրելով մեր ժողովրդին ծաղրի ենթարկելու փոխարեն,իսկ ես իսկապես դա համարում եմ ծաղր, պետք է ձեռքը սեղանին խփեր ու ասեր ՝ վերջ, այսօրվանից չենք գողանում, ոչ թե չեք գողանում, բոլորս միասին՝ չենք գողանում: Եվ պիտի ասեր` այսօրվանց հաստատվում է օրինականություն և դա հնարավոր է անել: Քաղաքական կամք է պետք այս հարցերը լուծելու համար:
Վերջում հիմնադիր նախագահը ասել է՝ հիշեք, կան մնայուն արժեքներ՝ հակառակ այս բոլոր դառնությունների: Այդ արժեքներից գլխավորը Հայաստանի անկախությունն ու մեր պետականության վերականգնումն է, ինչի կապակցությամբ սրտանց շնորհավորում եմ»:
