Ազգային ժողովի Էթիկայի հանձնաժողովը սեպտեմբերի 24-ի նիստում կքննարկի քաղաքացի Վարդգես Գասպարիի դիմումի քննության վերաբերյալ հարցը: «Փաստինֆո» լրատվական գործակալությունը տեղեկացնում է, որ ըստ ԱԺ կայքէջի, հարցի զեկուցողը խորհրդարանի աշնանային նստաշրջանում հանձնաժողովի նախագահությունը ստանձնած` «Հայ ազգային կոնգրես» խմբակցության ներկայացուցիչ Նիկոլ Փաշինյանն է:
Սա ԱԺ պատգամավորին վերաբերող քաղաքացիներից ստացված երրորդ դիմումի քննարկումն է: ՀՀ քաղաքացի Արթուր Զադոյանի և «Հանրային տեղեկատվություն և գիտելիքի կարիք» ՀԿ-ի` ԱԺ 3 պատգամավորներին վերաբերող նախորդ երկու դիմումների քննությունը հանձնաժողովը օգոստոսի 31-ի նիստում, շուրջ 3,5 ժամ տևած քննարկումների արդյունքում, որոշել էր մերժել:
ԱԺ կանոնակարգ-օրենքի համաձայն, Էթիկայի հանձնաժողովի նիստերը դռնփակ են, բացառությամբ այն դեպքի, երբ դիմումում նշված պատգամավորն առաջարկում է հանձնաժողովի նիստերն անցկացնել դռնբաց: Այդ իսկ պատճառով, դիմումները նախօրոք հրապարակման ենթակա չեն, սակայն դրանց վերաբերյալ հանձնաժողովի որոշումները և եզրակացությունները հրապարակվում են և տեղադրվում ԱԺ-ի պաշտոնական կայքէջում:
Դեռևս օգոստոսի վերջին ՀԱԿ ակտիվիստ Վարդգես Գասպարին ԶԼՄ-ներին հայտնել էր, որ դիմել է ԱԺ էթիկայի հանձնաժողովին` խնդրելով քննել ՀՀԿ խմբակցության անդամ, անկուսակցական Սամվել Ալեքսանյանի «վարքագիծը և կայացնել համապատասխան որոշում»:
«Հայտնում եմ, որ ս/թ հունիսի 21-ին՝ ժամը 09:35-ի սահմաններում, ՀՀ ԱԺ մուտքի մոտ (Դեմիրճյան փողոց) կանգնել էի՝ իմ ձեռքին ունենալով «Ռ. Հայրապետյան՝ Նեմեց, մարդասպան» կարգախոսը: Մինչ ժամը 10:00-ն որևէ միջադեպ տեղի չէր ունեցել` մինչև ԱԺ եկավ պատգամավոր Ս. Ալեքսանյանը: Նա մոտեցավ, իմ ձեռքից հափշտակեց իմ պաստառը և այն տարավ հանձնեց մոտ 20 մետր հեռու կանգնած խմբված անձանց (երևի հանցագործության հետքերը տեղում չթողնելու համար): Միևնույն ժամանակ ինձ մոտեցավ հիշատակված ջահելներից մեկը և փորձեց ինձ հետ ընդհարվել, քաշքշուկ ստեղծել: Դրա համար սկսեց ինձ դիմահար հրել դեպի հետ և շարունակեց հրել այնքան` մինչ ինձ տապալեց գետնին: Նշում եմ, որ ես ինչպես պատգամավոր Ալեքսանյանի, այնպես էլ նրան ընկերակցողի սադրիչ, խուլիգանական և բռնի գործողություններին բնավ չհակադրվեցի»,- Էթիկայի հանձնաժողովին ուղղված դիմումում մասնավորապես գրել է Վ.Գասպարին:
Քաղաքացին նշել է նաև, որ կատարվածը ֆիքսել են որոշ լրատվամիջոցներ, մասնավորապես` «Ա1+»-ը:
Ըստ դիմումատուի, ՀՀ ԱԺ պատգամավոր Ս. Ալեքսանյանն ակնհայտորեն ոտնահարել է ՀՀ Սահմանադրությամբ երաշխավորված իր մի շարք իրավունքները, մասնավորապես` խաղաղ, առանց զենքի հավաքներ անցկացնելու, իր կարծիքն ազատ արտահայտելու, խոսքի ազատության, ինչպես նաև ոտնահարել է իր արժանապատվությունը, որը որպես մարդու իրավունքների ու ազատությունների անքակտելի հիմք, հարգվում և պաշտպանվում է պետության կողմից:
