Ֆրանսիական արդարադատությունը արգելել է Քեմբրիջի դքսուհի Քեյթ Միդլթոնի կիսամերկ սկանդալային լուսանկարների կրկնակի հրապարակումը: Նման որոշում է այսօր կայացրել Փարիզի Նանտեր արվարձանի դատարանը, որտեղ երկուշաբթի բրիտանացի արքայազն Ուիլյամն ու նրա կինը քրեական և քաղաքացիական երկու հայց էին ներկայացրել:
Դատարանը Closer փայլերես ամսագրին պարտավորեցրել է լուսանկարների հրապարակման համար 2000 եվրո տուգանք վճարել և 24 ժամվա ընթացքում օրիգինալ լուսանկարները հանձնել բրիտանական թագավորական ընտանիքին: Այս մասին տեղեկացնում է ITAR-TASS-ն ու հիշեցնում, որ առաջինը հենց այդ ամսագիրն էր հրապարակել լուսանկարները:
Բրիտանացի զույգի փաստաբանը այս գործը համեմատել է արքայադուստր Դիանայի պատմության հետ, որի ողբերգական մահվան մեջ ընդունված է մեղադրել աներես պապարացիին:
«Մոնդադորի» հրատարակչատան (որին պատկանում է Closer-ը) ներկայացուցիչը ափսոսանք է հայտնել հայցի առնչությամբ և նշել, որ լուսանկարների հրապարակումը վիրավորական բնույթ չի կրում:
