ՀՅԴ ԱԺ խմբակցության քարտուղար Արտյուշա Շահբազյանը մեզ հետ զրույցում նշեց, որ գազի 2011թ.-ին գնի չթանկացման շուրջ Սերժ Սարգսյանի և Դմիտրի Մեդվեդևի համաձայնությունը չի կարելի միանշանակ որպես ուղիղ առևտուր պատկերացնել։
«Ի վերջո, կա ընդհանուր համգործակցություն, որի մեջ լուծվում են հայ-ռուսական տնտեսական, քաղաքական, ռազմական բոլոր խնդիրները և կուզեի, որ մենք նաև այս կոնտեքստը նկատի ունենայինք։ Նաև չի բացառվում, որ կոնկրետ ինչ-որ առևտրային համաձայնություններ են կայացել, բայց այստեղ հավանաբար ռուսական կողմը, նկատի ունենալով նաև Հայաստանում իր շահերը, որոշակի զիջումների է գնացել կամ այս տարի համաձայնել է գազը չթանկացնել»,- նշեց Արտյուշա Շահբազյանը։
Այն դիտարկմանը, թե իշխանության համար ավելի ճիշտ չէ՞ր լինի գազի թանկացմանը համաձայնել 2011թ.-ից, քան 2012թ.-ի նախընտրական շրջանում` ավելացրեց. «Երբ էլ թանկացնեն` ցանկալի չի։ Բայց իշխանությունը պետք է լրջորեն մտահոգվի այն հարցով, որ ժողովուրդը սոցիալական ծանր իրավիճակում է գտնվում»։