Եմենի նախագահ Աբդ Ռաբբո Մանսուր Հադին սեպտեմբերի 12-ին փոփոխություններ է կատարել առանցքային նախարարություններում և իր աշխատակազմում: Ինչպես հաղորդում է Reuters-ը, իրենց պաշտոններից զրկվել են նավթի և կրթության, ինչպես նաև հետախուզության և ազգային անվտանգության ծառայության նախարարները:
Գործակալությունը նշում է, որ հեռացված նախարարները համարվում էին նախկին նախագահ Ալի Աբդալլահ Սալեհի համախոները:
Ազատված պաշտոններում նշանակված նոր մարդիկ նախկինում սերտ կապեր չեն ունեցել Սալեհի հետ: Նրանցից շատերը մեծացել են երկրի հարավային շրջաններում. ծնունդով այդ շրջաններից է նաև գործող նախագահը:
Տեղի վերլուծաբանների կարծիքով՝ նման սերնդափոխությունը Եմենի ղեկավարությունում վաղուց էր հասունացել, քանի որ երկրի բնակչությունը դժգոհ էր Սալեհի հետ ասոցացվող մարդկանց ձեռքում իշխանության պահպանումից:
Բացի այդ, ավելի վաղ Հադին հեռացրել էր ուժային կառույցների մի շարք ղեկավարների, որոնցից ոմանք նախկին նախագահի ազգականներն էին:
Երկրի ղեկավար կազմում փոփոխությունները տեղի են ունենում պաշտպանության նախարար Մուհամմադ Նասեր Ահմադ Ալիի դեմ իրականացված մահափորձի հենց հաջորդ օրը: Հիշեցնենք. սեպտեմբերի 11-ին ականապատ ավտոմեքենայի պայթյունից 13 մարդ էր զոհվել, ինքը՝ նախարարը, չէր տուժել:
