Թուրքական Ihlas լրատվական գործակալության փոխանցմամբ՝ Վանի նահանգի Գևաշի շրջանում գտնվող Աղթամար կղզու հայկական Սուրբ Խաչ եկեղեցում ավարտվել են երրորդ պատարագի նախապատրաստական աշխատանքները: Այս մասին հայտարարել է Վանի փոխնահանգապետ Աթայ Ուսլուն:
Վերջինս այդ նպատակով շրջել է կղզում և եկեղեցում: Ուսլուն հայտարարել է, որ Աղթամարի եկեղեցում այս տարի պատարագը կանցկացվի սեպտեմբերի 9-ին, որը եկեղեցու վերանորոգումից ու թանգարանի վերածվելուց հետո կլինի թվով երրորդը:
Գևաշի շրջանի ղեկավար Յուսուֆ Գյունին իր հերթին հայտարարել է. «Պատարագի անցկացման նախապատրաստական աշխատանքները տևել են մեկ ամիս: Այժմ ամեն ինչ պատրաստ է պատարագի անցկացման համար: Կղզում կատարվել են մաքրման աշխատանքներ, ձեռնարկվել են անվտանգության միջոցառումներ:
Ներկայիս դրությամբ, տեղի հյուրանոցներն արդեն իսկ զբաղեցված են 80-90 տոկոսով: Մենք ակնկալում ենք, որ այս տարի պատարագի կապակցությամբ Աղթամար կայցելի 3000 մարդ: Մենք Գևաշի շրջանում սպասում ենք մեր հյուրերին և որևէ խնդիր չենք տեսնում այդ հարցում»:
