Երեկ` օգոստոսի 25-ին, կրակոցներ են հնչել Կոտայքի մարզում: Ժամը 21:10-ի սահմաններում Արմենիա բժշկական կենտրոնից ահազանգել են Ոստիկանության Նաիրի բաժին, որ հրազենային վնասվածքներով իրենց մոտ են տեղափոխվել երկու երիտասարդ:
Ֆոտոլրագրող Գագիկ Շամշյանը shamshyan.com-ին հայտնել է, որ հիվանդանոց են մեկնել Ոստիկանության Կոտայքի մարզային վարչության օպերատիվ խումբը` վարչության պետ Գրիշա Բադալյանի գլխավորությամբ: Օպերատիվ խումբը պարզել է, որ երիտասարդները Աշտարակ քաղաքի բնակիչներ 42-ամյա Վարդան Ավետիսյանն է և 24-ամյա Շավարշ Պետրոսյանը:
Գ. Շամշյանը հայտնել է, որ Վարդանը հրազենային վնասվածքը ստացել է կոնքի ձախ սրբանային շրջանի մասում, իսկ Շավարշը` ձախ ազդրի շրջանում: Ոստիկանության Նաիրի բաժնի աշխատակիցները պարզել են, որ նշված անձիք հրազենային վնասվածքը ստացել են Երևան-Աշտարակ ավտոճանապարհի 7-րդ կմ-ին, դեռևս անհայտ անձանց կողմից: Նշված վայր է ժանանել նաև Ոստիկանության քրեական հետախուզության գլխավոր վարչության պետի տեղակալ Սամվել Ասատրյանը:
Փաստի առթիվ Ոստիկանության քննչական գլխավոր վարչության Կոտայքի մարզի քննչական բաժնի Նաիրիի քննչական բաժանմունքում նյութեր են նախապատրաստվում:
Քննչական խումբը դեպքի վայրում հայտնաբերել է կրակված պարկուճներ: Նշանակվել է փորձաքննություն, ինչից հետո պարզ կլինի, թե ինչ հրազենից է արձակվել կրակոցները:
