Մեր ունեցած տեղեկություններով, ներմուծողները, օգտվելով Հայաստանում տիրող գնային թռիչքից, պատրաստվում են թանկացնել նաեւ ներմուծվող ապրանքների գները, ինչը, սակայն, ըստ սպառողների իրավունքների պաշտպանության ՀԿ-ի նախագահ Աբգար Եղոյանի՝ տրամաբանությունից դուրս է: Նա մեզ հետ զրույցում նշեց, որ եթե մեր ունեցած ինֆորմացիան իրականություն դառնա, ապա դա արդեն վերջնականապես կվկայի մեր ներկրողների անբարեխղճության մասին: «Գիտեք ինչ, այնպիսի իրավիճակ է ստեղծվել, որ այս աժիոտաժում բոլորը փորձում են ինչ-որ մի բան փախցնել այս խեղճ ժողովրդից: Ներմուծված ապրանքների թանկացումը տրամաբանությունից էլ է դուրս, քանի որ դոլարի կուրսը ամբողջ աշխարհում ընկնում է, հետեւաբար` ինչո՞ւ պետք է ներմուծված ապրանքները թանկանան: Այդ պատճառով այստեղ նույնիսկ տրամաբանություն չկա: Հուսով եմ, որ գոնե ներմուծված ապրանքների վրա գների թանկացումներ տեղի չեն ունենա»,- հույս հայտնեց սպառողների իրավունքների պաշտպանության նախագահը: