ՏԻՄ ընտրությունների առաջիկա ամենաինտրիգային պահը շարունակում է մնալ Գյումրիի քաղաքապետի ընտրությունը, մասնավորապես հարցը, թե արդյոք կառաջադրվի Վարդան Ղուկասյանը՝ գործող քաղաքապետը, որին չի սատարելու ՀՀԿ-ն, բայց որը մինչև այժմ հայտարարում է առաջադրվելու մտադրության մասին:
Ինչպես հայտնի է, ՀՀԿ-ն ոչ պաշտոնապես, բայց ակնհայտորեն սատարում է ԲՀԿ-ի թեկնածու Սամել Բալասանյանին: Գործարար, նախկին ՕԵԿ-ական Սամվել Բալասանյանն արդեն իսկ առաջադրվել է որպես քաղաքապետ: ԲՀԿ-ն ամեն կերպ հերքում է առաջադրումը ՀՀԿ-ի, մասնավորապես Սերժ Սարգսյանի հետ համաձայնեցրած լինելու փաստը, բայց, իհարկե, անգամ ոզնուն է տեսանելի, որ ՀՀԿ-ն տվել է համաձայնությունը, այլապես Բարգավաճ Հայաստանը կառաջադրեր առավել անցողիկ Մարտուն Գրիգորյանի թեկնածությունը: Ի դեպ, բավական ուշագրավ հայտարարություն է տարածել ոստիկանությունըʽ հայտարարելով, որ ստեղծում է ՏԻՄ ընտրություններում ոստիկանության գործողությունները համակարգող խորհուրդ, որպեսզի հասարակական կարգ ու կանոնի վերահսկողությունն առավել արդյունավետ լինի: Ոստիկանության այդ հայտարարությունն ուշագրավ է նրանով, որ Հայաստանում ՏԻՄ ընտրությունները սովորաբար ոստիկանությունից չեն պահանջում ջանքերի առանձնակի լարում:
Բայց այստեղ իրավիճակը ուշագրավ է դառնում թերևս հենց Գյումրիի պահով, և ոստիկանության քայլի մեջ թերևս հնարավոր է նկատել որոշակի նախազգուշացում Գյումրիի քաղաքապետ Վարդան Ղուկասյանին: Կասկած չկա, որ նրա առաջադրվելու պարագայում իրավիճակը Գյումրիում շատ լարված է լինելու, առավել ևս ընտրության օրվա՝ սեպտեմբերի 9-ին մոտենալուն զուգահեռ: Եթե Ղուկասյանն առաջադրվում է, ուրեմն անկասկած առաջադրվում է կռիվ տալու մտադրությամբ, այլապես որևէ իմաստ չունի իշխանության հովանավորությունը վայելող թեկնածուի դեմ առաջադրվել, հետո խելոք և լուռ պարտվել ու տանել պարտությունը:
Ոստիկանության քայլը՝ համակարգող խորհրդի ստեղծումը, ըստ երևույթին, բավական թափանցիկ ակնարկ է հենց Վարդան Ղուկասյանին այն իմաստով, որ ոստիկանությունը թույլ չի տալու առանձնակի դրսևորումներ: Ի վերջո, ակնհայտ է, որ ՏԻՄ ընտրություններում հասարակական կարգի խնդիր կարող է առաջանալ միայն Գյումրիում: Ընդ որում, այստեղ, իհարկե, խնդիրը Ղուկասյանի առաջադրումն էլ չէ, քանի որ եթե անգամ նա չդնի իր թեկնածությունը, նրա համար միգուցե մեծ կլինի գայթակղությունը հնարավոր բոլոր միջոցներով իշխանության համար խնդիրներ առաջացնել Բալասանյանին անցկացնելու առումով:
