Մեկ դար վաղեմության վինտաժային Rolls Royce ավտոմեքենան սեպտեմբերի մեկին աճուրդի կհանվի: Historics աճուրդի տան ներկայացուցիչները կարծում են, որ ավտոմեքենան խելքահան կանի կոլեկցիոներներին: Այս մասին հաղորդում է RBK-ն:
101 տարեկան Rolls Royce –ը գնահատվում է 550 հազար ֆունտ (855 հազար դոլար): 1911 թվականին, երբ սկսվեց մոդելի արտադրությունը, այն համարվում էր աշխարհում ամենաշքեղը: Այն ժամանակ ավտոմեքենան արժեր 1,5 հազար ֆունտ՝10 անգամ թանկ բրիտանացի ծառայողի տարեկան միջին աշխատավարձից: Նման գումարով XX դարի սկզբին մառախլապատ Ալբիոնում հնարավոր էր մեծ առանձնատուն ձեռք բերել:
Rolls Royce-ի այս մոդելը ավտոսիրողների և ԶԼՄ-ների կողմից անվանվել է «Արծաթե տեսիլք»: 1911 թվականի արտադրության այս օրինակը պատկանել է Ադոլֆ Թաքին՝ գործարար Ռաֆայել Թաքի որդուն: Նշենք, որ ընտանիքն իր կարողությունը դիզել է բացիկների վաճառքով:
Մեքենան ունի արշավների համար նախատեսված շամպայնի, բաժակների և զամբյուղի հատուկ խցիկ:.
