Մենք Սամվել Բալասանյանին վնասելու ոչ մի խնդիր չունենք

Հարցազրույց «Ժառանգություն» կուսակցության ներկայացուցիչ, Գյումրիում քաղաքապետի ընտրությունների թեկնածու Վահագն Հովհաննիսյանի հետ:

– Պարոʼն Հովհաննիսյան, հայտնի է, որ «Ժառանգություն» կուսակցությունը որոշել է մասնակցել Գյումրիի քաղաքապետի ընտրություններին, և քաղաքապետի այդ թեկնածուն Դուք եք:

-Ճիշտն ասած, այնքան էլ հայտնի չէ: Մենք դեռևս վերջնական չենք որոշել: Ուղղակի այդպիսի շտրիխներ կան: Հավանական է նաև իմ թեկնածությունը: Չորս օր հետո երևի թե պարզ կլինի` մենք առաջադրելու ենք իմ թեկնածությունը, թե չենք առաջադրելու:

– Իսկ ի՞նչ եք կարծում, առաջադրվելու դեպքում Դուք ի՞նչ հաջողություններ կարող եք արձանագրել: Հաղթելու հավանականություն կա՞ Ձեր կարծիքով:

– Երաշխիքներից մեկն այն է, որ Գյումրիում և Շիրակի մարզում «Ժառանգությունը» բավականին լուրջ ձայներ է հավաքել` շուրջ տասը տոկոս: Իմ կարծիքով` ամենամեծ երաշխիքը դա է: Խորհրդարանական ընտրությունները ցույց տվեցին, որ «ժառանգությունը» բավականին լուրջ էլեկտորատ ունի Գյումրիում:

– Պարոʼն Հովհաննիսյան, կարծում եք` խորհրդարանական ընտրություններին հավաքած 10 տոկոս ձայների քանակը բավականաչա՞փ է ՏԻՄ ընտրություններում հաղթելու համար: Հիշեք, թե որքան ձայներ հավաքեց ԲՀԿ-ն Գյումրիում:

– Իմ կարծիքով` բավականաչափ չէ: Բայց թե հետագայում ինչպիսի զարգացումներ կարող են տեղի ունենալ, մենք այս պահին չենք կարող ասել: Գուցե ավելի մեծ թիվ կազմի, գուցե ավելի փոքր թիվ կազմի: Բայց, այնուամենայնիվ, սա մեզ թույլ է տալիս, որ մենք, լինելով լուրջ կուսակցություն, այդ գործընթացներին անպայման մասնակցենք: Մեր ներկայությունը, իմ կարծիքով, պետք է:

– Այսինքն, թեկնածության առաջադրումը զուտ ներկայացուցչակա՞ն մասն է ապահովում և ոչ հանուն հաղթանակի՞:

– Չէ, ինչո՞ւ: Նաև հաղթանակի համար ենք մասնակցելու: Մի քիչ հուսահատություն կա բոլորիս մեջ այն առումով, որ մեզ պարզ են մյուս թեկնածու ընկերները ու նաև գիտենք ընտրական տեխնոլոգիաները: Բայց, այնուամենայնիվ, դա մեզ հետ չի պահում: Մենք պատրաստ ենք մասնակցել գործընթացներին` անկախ նրանից, թե ինչ ձեւով են անցկացվելու ընտրությունները, ինչ խախտումներ են լինելու: Ինձ թվում է` մենք պարտավոր ենք մասնակցել ընտրություններին:

– Պարոʼն Հովհաննիսյան, փաստորեն, Դուք Սամվել Բալասանյանին լուրջ մրցակի՞ց եք համարում և վտա՞նգ եք տեսնում նրա հետ մրցակցելու գործում:

– Բացարձակապես: Իսկ ինչո՞ւ պիտի վտանգ տեսնեմ կամ անհանգստանամ:

– Դուք կարծում եք, որ կարո՞ղ եք հաջողության հասնել նախորդ ընտրություններին «Ժառանգության» հավաքած ձայների 10 տոկոս չափաբաժնով, այն պարագայում, երբ Ձեր մրցակից Սամվել Բալասանյանը ոչ միայն ԲՀԿ-ի թեկնածուն է, այլև Բաղրամյան 26-ի ֆավորիտը:

– Բացառված չէ: Կարող է և հաջողություն լինել:

– Իսկ հնարավոր է, որ Ձեր` քաղաքապետի, թեկուզ զուտ մասնակցային հարցն ապահովող առաջադրմամբ հետագայում վնասեք Սամվել Բալասանյանի` քաղաքապետի լեգիտիմությանը:

– Ճիշտն ասած, չեմ կարող ասել… Բացարձակապես: Մենք Սամվել Բալասանյանին վնասելու ոչ մի խնդիր չունենք: Մենք ուղղակի առաջադրելու ենք մեր թեկնածուին,մեր ծրագիրն ենք ներկայացնելու: Մենք մեր աշխատելաոճն ունենք, մեր ձևն ունենք: Մեր առաջադրումը Սամվել Բալասանյանի կամ մյուս թեկնածուի հետ ոչ մի կապ չունի, մենք նրանց հետ ոչ մի առնչություն չունենք:

– Ի դեպ, Վարդան Ղուկասյանի տրամադրությունը ո՞նց է: Շա՞տ անտրամադիր է:

– Ես չգիտեմ: Նրա հետ չեմ խոսել: Չեմ կարող ոչինչ ասել:

– Իսկ ինչո՞ւ Վարդան Ղուկասյանին անկյուն քշեցին:

– Մի քիչ բարդ հարց է: Ավելի լավ է Դուք Վարդան Ղուկասյանին հարցնեք: Երևի թե ամեն մարդ իր ժամանակն ունի: Երբ լրանում է այդ ժամանակը, նա պետք է հեռանա:

– Իսկ Դուք հավանու՞մ եք Վարդան Ղուկասյանին` որպես քաղաքապետ:

– Ճիշտն ասած, ես իմ կարծիքը չեմ ուզում ասել, բայց Գյումրիում կա որոշակի էլեկտորատ, որը հավանում է Վարդան Ղուկասյանին:

– Դուք նրանց շարքերո՞ւմ եք:

– Ոչ: Ես նրանց շարքերում չեմ:

– Իսկ հնարավո՞ր է, որ նա վերջին պահին միտքը փոխի և վերաառաջադրվի:

– Շատ հնարավոր է: Իմանալով նրա բնավորությունը` հնարավոր է, որ նա վերջին պահին մտափոխվի:

– Իսկ ինչ նախընտրական ծրագիր ունեք առաջարկելու գյումրեցիներին:

– Ինչ էլ առաջարկելու լինենք, իրատեսության սահմաններում է լինելու: Առաջինը` կառավարման համակարգն ենք փոխելու: Խմբակցությունում դեռ չի քննարկվել, բայց կոնկրետ ես ունեմ փոփոխությունների ծրագիր, որի իրագործումը իրատեսական է: Օրինակʽ քաղաքի բյուջեն, որը ստվերում է, կարելի է ստվերից դուրս հանելով` բյուջեն համալրել: Ինձ համար անհասկանալի է քաղաքի տրանսպորտի կառավարումը: Քաղաքի տրասնպորտից դժգոհ են բոլորը: Աղբահանության հետ կապված ծրագիր ունենք: Ներդրումների ծրագիր` Սփյուռքից և այլ տեղերից:

– Իսկ բնակատեղիների ապահովման մասով Ձեր ծրագրում դրույթներ նախատեսո՞ւմ եք: Ի վերջո, գյումրեցիների հիմնական խնդիրը ծածկ չունենա՞լն է:

– Իշխանությունը, կարծես, զբաղվում է այդ խնդրով, բայց չգիտես ինչու` դանդաղում է այդ ծրագիրը: Ամեն դեպքում, մարդիկ, կարծես թե, ստանում են տներ: Ես լավ չգիտեմ, թե այս պահին որքան է կազմում քաղաքի անտունների թիվը: Այս պահին այդ տվյալներին չեմ տիրապետում: