Վրաստանում խորհրդարանական ընտրությունների նախընտրական պայքարը գնալով սրվում է երկու կուսակցության միջև` Միխեիլ Սաակաշվիլիի ղեկավարած «Ազգային շարժում» կուսակցության և Բիձինա Իվանիշվիլու ղեկավարած «Վրացական երազանք» կուսակցության միջև: Այս մասին այսօր «Առաջին լրատվական»-ի հետ զրույցում ասաց Ջավախահայերի ասամբլեայի ղեկավար Առնոլդ Ստեփանյանը` խոսելով նախընտրական պայքարի շուրջ:
Նա նշեց, որ արդեն կարելի է խոսել մի քանի լուրջ խախտումների մասին:
«Ամեն շաբաթ երկու-երեք լուրջ խախտում է տեղի ունենում իշխանության կողմից` ճնշումներ ընդդիմության նկատմամբ: Ջավախքում «Վրացական երազանք» կուսակցության ներկայացուցիչներին հնարավորություն չէին տալիս, որ գրասենյակ բացեին, մի տեղ էլ այն մարդը, ով գրասենյակ էր վերցրել, ազատազրկել են, հնարավորություն չեն տալիս, որ ինտերնետ անցկացնեն»,- նշեց Առնոլդ Ստեփանյանը` հավելելով, որ իշխանությունը տեխնիկական հարցերով խնդիրներ է ստեղծում ընդդիմության համար:
Առնոլդ Ստեփանյանի վստահեցմամբ` ջավախահայերը մեծամասամբ աջակցում են ընդդիմադիր Բիձինա Իվանիշվիլու ղեկավարած «Վրացական երազանք» կուսակցությանը:
