Երեկ, կարելի է ասել, սենսացիոն հայտարարությամբ է հանդես եկել ՌԴ նախագահի մամուլի քարտուղար Դմիտրի Պեսկովը: Նա ասել է, որ ամերիկյան պատժամիջոցները նպատակ ունեն երկրի բիզնես էլիտային տրամադրել Վլադիմիր Պուտինի դեմ` 2018-ի նախագահական ընտրությունների վրա ազդելու միջոցով: Թերևս առաջին անգամ Պուտինի շրջապատն անուղղակիորեն խոստովանում է, որ ռուս-ամերիկյան հակադրությունը ճաքեր է առաջացրել Ռուսաստանի իշխանության վերնախավում: Սա ուշագրավ հայտարարություն է, որը, ըստ էության, հակադրության մեջ է մտնում Պուտինի ինքնավստահ ու ինքնահավան կերպարի հետ:
Արդեն փետրվար ամսին ՍՄՆ-ում նախապատրաստվելու է համապարփակ զեկույց այն գործիչների ու բիզնեսմենների վերաբերյալ, որոնք մտերիմ հարաբերությունների մեջ են Պուտինի հետ: Խոսքը, ըստ էության, «սև ցուցակի» մասին է, որում ընդգրկված գործիչների նկատմամբ կիրառվելու են անհատական պատժամիջոցներ: Այդ ցուցակում արդեն իսկ ընդգրկված են Պուտինին մոտ կանգնած գործարարներ` Յուրի Կովալչուկ, Արկադի և Բորիս Ռոտենբերգներ, Գենադի Տիմչենկո: Անգլիական Guardian-ին ռուսաստանցի օլիգարխներից մեկը, որը, բնականաբար, չի ցանկացել բացահայտել իր անունը, ասել է, թե ամեն կերպ խուսափում է մասնակցել հրապարակային միջոցառումների, որոնց ներկա է լինելու Պուտինը` ամերիկյան պատժամիջոցներից խուսափելու համար:
Պուտինի տասնյոթամյա իշխանության ընթացքում թերևս առաջին անգամ էլիտայում առաջացել են անհաղթահարելի թվացող հակասություններ, գոյացել են համակարգային ճաքեր, որոնք խորանալու միտում ունեն: Սառը պատերազմը կամ այդ ռեժիմը հիշեցնող այսօրվա հակադրությունը, ըստ ամենայնի, ավարտվում է Ռուսաստանի պարտությամբ, մանավանդ, որ տնտեսական ճգնաժամը միայն խորանալու միտում ունի: Ռուսական Forbes-ի կանխատեսմամբ` ռուբլին առաջիկա ամիսներին արժեզրկվելու է 10%-ով:
Ռուսաստանի ավտորիտար առաջնորդի շրջապատն այսօր մտածում է ոչ թե 2018-ի նախագահական ընտրություններում հաղթելու, այլ առավելապես համակարգային կոնսոլիդացիան պահպանելու մասին, որովհետև մեծ է վտանգը, որ ռուսական էլիտան կարող է զոհաբերել Պուտինին` Արևմուտքի հետ հարաբերությունները կարգավորելու նպատակով:
Հայաստանի իշխանություններն ու անձամբ Սերժ Սարգսյանը թերևս տեղեկացված են այն ինստիտուցիոնալ ճգնաժամի մասին, որում հայտնվել է Պուտինի վարչախումբը: Կարելի է ենթադրել, որ նաև դրանով էր պայմանավորված Սերժ Սարգսյանի անձնական շահագրգռությունը ԵՄ-ի հետ նոր համաձայնագրի ստորագրման հարցում: Սերժ Սարգսյանի հիմնական մոտիվն այս պարագայում սեփական համակարգի կայունության ապահովումն է, իշխանության պահպանման այլընտրանքային ռեսուրսների ստեղծումը: Սակայն սա այն եզակի դեպքերից մեկն է, որ Սերժ Սարգսյանի իշխանության և Հայաստանի հասարակության շահերը գրեթե ամբողջությամբ համընկնում են:
Եթե նույնիսկ Հայաստանի էլիտան ու հասարակությունը մինչև վերջ չեն գիտակցում, որ տրվել է ռուսական կայսրության քայքայման մեկնարկը: Գործընթացը ցավոտ է լինելու և միամիտ կլինի ենթադրել, որ գործընթացն ավարտվելու է մեկ-երկու տարում: Մյուս կողմից` գործընթացն անշրջելի է, և Հայաստանի քաղաքական համակարգը պետք է դրսևորի հաշվենկատություն, առաջնորդվի ռազմավարական մտածողությամբ, որպեսզի Հայաստանը չհայտնվի կայսրության փլատակների տակ` այս ընթացքում հասցնելով դիվերսիֆիկացնել Հայաստանի արտաքին քաղաքականությունը, անվտանգության համակարգը: Հայաստանի եվրաինտեգրման նոր մակարդակը տալիս է այդ հնարավորությունը, եթե ԵՄ-ի հետ նոր համաձայնագիրը վերածվի կոնկրետ բարեփոխումների, գործողությունների:
