«Առաջին լրատվական»-ի զրուցակիցն է գործարար Սիլվա Համբարձումյանը:
– Տիկին Համբարձումյան, լրացավ նոր կառավարության գործունեության մեկ տարին: Ինչպե՞ս կգնահատեք կառավարության, Կարեն Կարապետյանի աշխատանքը:
– Կառավարության գործունեությունը եթե այս տեմպով գնա, ես կգնահատեմ լավ, որովհետև մի տարվա մեջ ոչ մի բան հնարավոր չէ ամբողջությամբ փոխել: Անգամ ընտանիքում, երբ ուզում ես մի գործ ձեռնարկել, մեկ տարում ոչ մի բան չի փոխվում: Ժամանակ է պետք, որ Կարեն Կարապետյանը կարողանա իր բոլոր ծրագրերը իրականացնել: Եվ բոլորս պետք է սատարենք Կարեն Կարապետյանին, որպեսզի նա կարողանա կատարել ու ավարտել իր առաջ դրված ծրագիրը: Իսկ երբ այդ ծրագիրը կատարված-ավարտված չէ, չես կարողանա ոչ մի բան գնահատել: Ճիշտ է, վատ վիճակ է, մարդիկ արտագաղթում են, և դա սարսափելի է: Բայց պետք է զինվենք համբերությամբ և սպասենք ևս մեկ տարի, ու արդեն կտեսնենք Կարեն Կարապետյանի շարժը, հաջողությունները:
– Բայց կարծեք թե այդքան ժամանակ չկա: Մամուլը գրում է, որ 2018-ի ապրիլին վարչապետի փոփոխություն է լինելու: Կարեն Կարապետյանի՝ վարչապետի պաշտոնում մնալու շանսերը այնքան էլ մեծ չեն: Դուք ինքներդ ո՞ւմ կցանկանաք տեսնել վարչապետի պաշտոնում:
– Ինձ համար և Սերժ Սարգսյանը, և Կարեն Կարապետյանը՝ երկուսն էլ ընդունելի են: Վարչապետը կփոխվի, չի փոխվի՝ դա արդեն ՀՀԿ-ի որոշելիք հարցն է, բայց կարծում եմ՝ ժողովրդին էլ պետք է հաշվի առնենք, թույլ տանք, որ իր կարծիքը հայտնի: Կարծում եմ, որ պետք է Կարեն Կարապետյանին ևս մեկ տարի ժամանակ տալ, որ նա կարողանա աշխատել ու արդյունք գրանցել: Այդ պարագայում մենք հաստատ արդյունք կտեսնենք: Ես էլ, որ ուզում եմ մի գործ սկսել, մի գործարք անել, մեկ տարի միայն բանակցում եմ, որից հետո նոր հաջողվում է գործարքը: Ամեն բան այդքան էլ հեշտ չի, ինչպես բոլորն են պատկերացնում: Մենք պատերազմական երկիր ենք, այդ ամենը պետք է նկատի ունենալ: Ներդրողներին համոզել-բերելն էլ հեշտ չի: Ժամանակ է պետք, ջանք է պետք դրա համար:
– Վարչապետի պաշտոնում նշանակվելիս Կարեն Կարապետյանը այդ ամենը քաջ գիտեր, բայց նա առաջին ամիսներին միայն ու միայն ներդրումներից ու ներդրողներից էր խոսում, բայց կարծես թե այդ ուղղությամբ ոչ մի դրական արդյունք չկա:
– Ես կրկնում եմ՝ պատերազմական երկրում ներդրողներ համոզել-բերելը շատ դժվար է, ջանք է պետք: Տա Աստված, շուտով ես էլ կարող է լավ ներդրողներ բերեմ, հիմա բանակցում եմ: Պլանավորում ենք Մեղրիում նավթամշակման գործարան կառուցել: Խողովակներով նավթը կբերենք, կմշակենք, և դա բավականին լավ արդյունքներ կունենա: Նախկինում մենք այդտեղ մի քանի գործարան ենք ունեցել, ես ուզում եմ հիմա դրանք վերականգնել, աշխատատեղ բացել, որ արտագաղթ չլինի: Թեկուզ ցածր աշխատավարձով, բայց մարդը կգերադասի մնալ Հայաստանում:
– Իսկ ո՞ւմ հետ եք բանակցություններ վարում, և ե՞րբ իրատեսական կդառնան Ձեր ներդրումները:
– Այս պահին հենց վարում եմ բանակցությունները: Երկու գործուղման պետք է գնամ, որից հետո, կարծում եմ, բանակցությունները կավարտվեն, և ես կարծում եմ, որ մինչև հունվարի 30-ը արդյունք կլինի արդեն: Խոսքը շատ մեծ ներդրումների մասին է՝ մոտ 1 միլիարդ դոլարից ավելի: Շատ դժվար է այդ գործընթացը: Այսօր ինձ դրսում հարգում են, սիրում են, իմ խոսքը թանկ է, բայց դժվար է ներդրողին համոզել-բերել: Դրսում մեր երկրի մասին շատ վատ կարծիք կա: Մինչև ներդրողին համոզում-բերում ենք, տարիներ են տևում: Շատ ցավալի վիճակ է: Շատ ներդրողներ այսօր ցանկանում են հեռանալ Հայաստանից անօրինական գործողությունների, արդարադատության պակասի պատճառով: Մարդիկ պարզապես ուզում են թքել ու հեռանալ: Դրա համար կառավարությունը պետք է իր նախարարներին մի քիչ հորդորի ներդրողների հետ նորմալ վարվել, նախարարները անկապ աշխատում են, բացարձակ անտեղյակ են իրենց ոլորտից, ու դա խայտառակ վիճակ է: Ամոթալի վիճակ է մեր երկրի համար: Ներդրումներ բերելուց առաջ մեր երկրում ներդրումային մթնոլորտը, վիճակը պետք է փոխել, ոլորտից տեղյակ, պրոֆեսիոնալ կադրերի նշանակել նախարարական պաշտոններում: Սա կբարձրացնի մեր երկրի հեղինակությունը, վարկը, ու ներդրողները արդեն այդքան վատ պատկերացում չեն ունենա մեր երկրի մասին:
– Տիկին Համբարձումյան, մամուլը գրել էր, որ Դուք վերջերս 4 միլիոն դոլարով ձեռք եք բերել Արաբկիրի նախկին թաղապետ Ալբերտ Երիցյանի առանձնատունը, ապա այն վաճառել եք ոստիկանապետ Վլադիմիր Գասպարյանին: Իսկապե՞ս այդ գործարքը կատարվել է:
– Այդպիսի բան չկա: Ես ոչ մեկի հետ ոչ մի առքուվաճառք չեմ արել. կարող եք կադաստրից հարցում անել: Ձեր նշած անձանց հետ առհասարակ ոչ մի գործարք չի եղել:
