Կիրակի օրը պատարագից առաջ և հետո, ըստ պատարագի ներկաների, Գուգարաց թեմի առաջնորդ Սեպուհ արքեպիսկոպոս Չուլջյանը դարձյալ քննադատել է ԱԺ պատգամավոր, «Լուսավոր Հայաստան» կուսակցության ղեկավար Էդմոն Մարուքյանին: «Առաջին լրատվական»-ի հետ զրույցում սրբազանը նշեց, որ այլևս չի ուզում խոսել այդ թեմայով. «Այդ թեման համարում եմ փակված և այլևս չեմ ուզում անդրադառնալ»:
Մեր հարցին՝ արդյոք հոգևորականը պե՞տք է զբաղվի քաղաքական հարցերով, սրբազանը արձագանքեց. «Մի՞թե հաշտություն, խաղաղություն ասելը քաղաքականություն է»: Իսկ ինչո՞ւ այս պահին որոշեց խոսել այդ մասին, երբ բավականին թեժ ընտրապայքար է, հետընտրական իրավիճակ Վանաձորում՝ հարցին Սեպուհ սրբազանը պատասխանեց՝ թող դատի տային, եթե ընտրությունների արդյունքները կվիճարկվեին դատարանում, ինքը չէր գնա, չէր օրհնի:
Հետաքրքրվեցինք՝ արդյոք սա իշխանության կողմից նման քարոզ անելու պահա՞նջ էր, սրբազանը նշեց, որ իր ամբողջ 20 տարիներին «սեր և խաղաղություն է քարոզել»:
«Լուսավոր Հայաստան» կուսակցության ղեկավար Էդմոն Մարուքյանն «Առաջին լրատվական»-ի հետ զրույցում նշեց, որ կիրակի օրը պատարագին ներկա հավատացյալները պատմել են, որ կրկին անդրադարձ է եղել, ընդ որում՝ վիրավորական արտահայտություններ է արվել իրենց ընտանիքի, քաղաքական ուժի հասցեին:
«Ես ի սկզբանե ասել եմ, որ մեզ համար այս թեման փակված է, և չեմ մեկնաբանել, բայց, փաստորեն, սրբազանը շարունակում է թեման, վիրավորում՝ օգտագործելով եկեղեցու հարթակը: Ժամանակին երբ նա կոչ է արել, կոչ եմ արել իրեն և դրանից հետո չեմ արձագանքել: Այդ թեման ինձ համար փակված է եղել և հիմա էլ փակված է: Վիրավորանքներին էլ չեմ պատասխանել, որովհետև մենք կռիվ չունենք տալու՝ չնայած վիրավորանքն ու հիասթափությունը շատ մեծ են: Մեր գործունեությունը քաղաքական է և ուղղված է քաղաքական գործընթացներին: Մեր միակ թիրախը իշխանությունն է: Ամեն մեթոդ օգտագործվում է Վանաձորում այս պահին կոնսոլիդացված միակ ընդդիմադիր ուժը թուլացնելու և ոչնչացնելու համար»,- ասաց Էդմոն Մարուքյանը:
Նա նշեց, որ իշխանության կողմից պատվեր է իջեցվել, ամեն բան անում են թուլացնելու ԼՀ կուսակցությունը, քանի որ իշխանության համար անակնկալ իրավիճակ է, նրանք ցուգցվանգի մեջ են: «Մեր ձեռնարկած քաղաքական գործընթացի արդյունքում այս պահին ՀՀԿ-ն փոքրամասնություն և ընդդիմություն է Վանաձոր քաղաքում: Օգտվելով առիթից՝ ուզում եմ տեղեկացնել, որ մինչ օրս Վանաձորից ընտրված պատգամավորի, ԼՀ կուսակցության, ավագանու անդամների կամ մեր թիմի դեմ իշխանությունը ատելություն քարոզելով՝ չի կարողանում մեզ թուլացնել, ընդհակառակը՝ ավելի է ուժեղացնում: Իրենց օգտագործած էներգիան հետ է գնում իրենց, և թուլանում են իրենք, ոչ թե մենք»,- հավելեց Էդմոն Մարուքյանը: