Հատուկ քննչական ծառայությունն այսօր տեղեկություն է տարածել, որ մաքսային ծառայությունների աշխատակիցների մի շարք գործողությունների հիման վրա հարուցվել են քրեական գործեր և կատարվում է քննություն: ՀՔԾ տարածած հաղորդագրության համաձայն՝ մաքսավորների գործողությունների հետևանքով պետությանը պատճառվել է ավելի քան 110 միլիոն դրամի վնաս:
Իհարկե, պետությանն այս ընթացքում պատճառվում են միլիարդավոր դրամների վնասներ, որոնք, սակայն, մնում են չբացահայտված, սակայն տվյալ պարագայում, իհարկե, խնդիրն այլ է, և սա հասկանում են բոլորը: Այսինքն՝ խնդիրը ոչ այնքան վնասների բացահայտումն ու պայքարն է դրա դեմ, այլ ներիշխանական պայքարը, որ ընթանում է տեղի ունեցող վերադասավորումների շրջանակում:
Եվ այս իմաստով շատ հետաքրքրական է, որ ՀՔԾ հաղորդագրությունը մաքսայինի աշխատակիցների գործողությունների առիթով քրեական գործի մասին հրապարակվում է ՊԵԿ նորանշանակ նախարար Վարդան Հարությունյանի՝ նախօրեին լրատվամիջոցների հետ ունեցած ճեպազրույցներից հետո, որոնցում Հարությունյանը բավականին ուշագրավ հայտարարություններ էր արել ստվերի դեմ պայքարելու, նոր խաղի կանոնների մասին, այն մասին, որ ինքն է այդ կանոնները ֆիքսողը, և ովքեր չհամապատասխանեն դրան՝ կհեռացվեն:
Թվում է, որ ահա այս հայտարարություններից հետո ՀՔԾ հաղորդագրությունը տրամաբանական շարունակությունն է, որով ցույց է տրվում, որ ՊԵԿ նոր ղեկավարության խոսքն իսկապես համապատասխանում է իրականությանը և իսկապես պայքար է մղվում մաքսային կամայականությունների և չարաշահումների դեմ: Սակայն իրականում այս հաջորդականությունը կարծես թե ունի բոլորովին այլ տրամաբանություն, և ՀՔԾ հաղորդագրությունն ըստ ամենայնի գալիս է Վարդան Հարությունյանի հայտարարությունները «ծածկելու»:
Իրավիճակը այլ կլիներ, եթե ՀՔԾ-ն գործեր, օրինակ, ՊԵԿ նոր ղեկավարության դիմումի հիման վրա, ՊԵԿ նոր ղեկավարության հաղորդմամբ հարուցվեին քրեական գործեր, կատարվեին ուսումնասիրություններ, Վարդան Հարությունյանը հայտարարեր, որ մի շարք գործերով դիմել է Հատուկ քննչական ծառայություն, որպեսզի իրականացվի քննություն և այլն: Բայց տեղի է ունենում այլ բան՝ ՊԵԿ նոր ղեկավարը հայտարարում է խաղի նոր կանոնների մասին և այն մասին, որ ինքն է ֆիքսում դրանք, իսկ դրան անմիջապես հաջորդում է ՀՔԾ հաղորդագրությունը, որով կարծես թե ցույց է տրվում, թե ով է որոշողը:
Սա իսկապես հետաքրքրական դրվագ է, եթե նկատի առնենք այն, որ ՀՔԾ-ն այն մարմինն է, որը գործում է անմիջականորեն Սերժ Սարգսյանի ենթակայության տիրույթում, իսկ ՊԵԿ նոր նախագահ Վարդան Հարությունյանը Կարեն Կարապետյանի թիմի անդամն է և այդ տրամաբանության շրջանակում է նշանակվել ՊԵԿ նախագահ:
Այդպիսով, Վարդան Հարությունյանի բավականին կտրուկ հայտարարություններին հաջորդում է ՀՔԾ ոչ պակաս կտրուկ բնույթի հաղորդագրությունը, որով ՀՔԾ-ն ցույց է տալիս ՊԵԿ համակարգում իր գործունեության սահմաններն ու շրջանակները, կամ միգուցե ճիշտ կլինի ասել՝ Սերժ Սարգսյանն է ցույց տալիս, թե ով է, այնուամենայնիվ, խաղի կանոնները որոշողը:
Ի դեպ, այս տեսանկյունից Սերժ Սարգսյանը դեռևս երկու տարի առաջ է հստակ ցույց տվել, թե ինչ գործիք է իր համար ՀՔԾ-ն, երբ Վերահսկիչ պալատի նախագահ Իշխան Զաքարյանին ուղղակի սպառնաց դրանով, երբ վերջինս հայտարարել էր, որ բյուջեի 1/3-ը մսխման ռիսկի տակ է: Սերժ Սարգսյանը հայտարարեց, որ Զաքարյանը անցնում է իր գործունեության դաշտի սահմանները: Դրանից հետո Զաքարյանը լռեց:
Լուսանկարը՝ Photolure-ի
