Լաս Վեգասում անցկացված երրորդ և եզրափակիչ դեբատներում ԱՄՆ նախագահի թեկնածուներ Հիլարի Քլինթոնն ու Դոնալդ Թրամփը բանավիճել են աբորտի իրավունքի, զենքի կրման ամերիկացիների իրավունքի, միգրացիայի և Վլադիմիր Պուտինի թեմաներով։ Այս մասին հայտնում է BBC-ն։
Նևադայի համալսարանում հանդիպման մեկնարկին թեկնածուների միջև ձեռքսեղմում տեղի չի ունեցել։
Թրամփն ասել է, որ կպաշտպանի զենքի կրման իրավունքի մասին սահմանադրության երկրորդ ուղղումը։ Քլինթոնը կարծում է, որ զենքի սեփականատիրոջ նկատմամբ ավելի խիստ վերահսկողությունը չի հակասում երկրի հիմնական օրենքի համապատասխան ուղղմանը։ Այն նախատեսում է զենքի տիրոջ ավելի մանրակրկիտ ստուգում։
Դեմոկրատ թեկնածուն խոստացել է պաշտպանել աբորտի իրավունքը՝ վկայակոչելով աբորտների օրինականացման մասին Գերագույն դատարանի՝ 1973 թվականի որոշումը։ Թրամփն իր հերթին վստահություն է հայտնել, որ իր ընտրվելու դեպքում Գերագույն դատարանը կչեղարկի այդ որոշումը, իսկ դա տեղի կունենա շնորհիվ իր կողմից նշանակվելիք, կյանքի համար հանդես եկող դատավորների։
Այնուհետև թեկնածուներն անդրադարձել են Ռուսաստանի հետ հարաբերություններին։
Թրամփի ակնարկին, թե Պուտինը չի հարգում Քլինթոնին, դեմոկրատ թեկնածուն պատասխանել է, որ Պուտինը պարզապես ցանկանում է, որպեսզի ԱՄՆ նախագահական աթոռը զբաղեցնի իր խամաճիկը։
«Խամաճիկը դու ես»,-ասել է Թրամփը՝ նշելով, որ Քլինթոնին դուր չի գալիս Պուտինն այն պատճառով, որ վերջինս «խորամանկել է» բոլոր ուղղություններով։
Թրամփը կարծում է, Ռուսաստանը, Սիրիան ու Իրանը հաղթել են ԱՄՆ-ին սիրիական հակամարտության շուրջ իրավիճակում։
Թրամփը դեբատների ժամանակ նաև խոստացել է իր ընտրվելու դեպքում չեղարկել նախագահ Բարաք Օբամայի կողմից անցկացվող առողջապահական բարեփոխումը՝ անվանելով այն երկրի համար կործանարար։
