«Սասնա ծռերի» անդամ Վարուժան Ավետիսյանը քիչ առաջ «Առաջին լրատվական»-ի հետ զրույցում փոխանցել է, որ պատրաստ է հենց այս պահին բաց թողնել բժիշկներին, եթե գա հաջորդ հերթափոխը: Նա փոխանցեց, որ բժիշկները իրենց լավ են զգում, իրենց մասնագիտական պարտքն են կատարում:
Հարցին՝ ինչո՞ւ թույլ չի տրվում, որ վիրավորները գնդից դուրս՝ հիվանդանացում բուժում ստանան, Վարուժան Ավետիսյանը պատասխանեց, որ Պավլիկ Մանուկյանը հենց դա էլ փորձել է անել, սակայն հենց վիրավորին հանձնելիս նրա վրա կրակել են, և խախտվել է պայմանավորվածությունը. իրենք պատրաստ են այստեղ մնալ, բայց չհանձնվել ԱԱԾ-ին:
«Այդ միջազգային կազմակերպությունները, բժիշկները, որ վայնասուն են բարձրացրել, թե պատանդներ ենք այստեղ պահում, թող բարի լինեն հայտնել, որ այլ բժիշկներ են պատրաստակամություն հայտնել գալ այստեղ՝ իրենց պարտականությունը կատարելու»:
Հարցին՝ ի՞նչ գործողություն են իրականացնելու այն բանից հետո, երբ Պավլիկ Մանուկյանը իրենց հետ չէ, Վարուժանը պատասխանեց, որ չեն հանձնվելու, շարունակելու են՝ մինչև հասնեն իրենց նպատակին: Մեր հարցին՝ ի՞նչ վիճակում են վիրավորները, պատասխանեց՝ բարվոք, փորձում են նրանց օգնություն ցույց տալ. «Հորդորում եմ կրկին կապիկություն չանել, այստեղ պատանդներ չկան»:
Լուսանկարը՝ Photolure-ի
