Իսլամը համատեղելի է արևմտյան լիբերալ արժեքների հետ՝ համոզված է Լոնդոնի նոր քաղաքապետ Սադիկ Խանը։ Այս մասին հայտնում է RIA Novosti-ն։
Խանը, ով անցած հինգշաբթի ստացել է բրիտանական մայրաքաղաքի քաղաքապետի ընտրությունների պատմության մեջ ընտրողների ամենամեծ թվով ձայները, դարձել է այդ պաշտոնում առաջին մուսուլման քաղաքապետը։
«Անցած հինգշաբթի կայացած ընտրությունները ցույց են տվել, որ իսլամն ու արևմտյան լիբերալ արժեքները համատեղելի են»,- ասել է նա՝ նշելով, որ բոլորս ունենք անհատականության բազմաթիվ արտահայտություններ։ «Ես լոնդոնցի եմ, բրիտանացի, եվրոպացի, հայր, ամուսին, մուսուլման, ունեմ ասիական ծագում, ծագումով Պակիստանից եմ, ես մարզական երկրպագու եմ։ Ոչ մի բան չի բնորոշում ինձ ամբողջությամբ»,- ասել է Խանը բրիտանացի և օտարերկրացի լրագրողների փոքր խմբի հետ հանդիպման ժամանակ։
«Ես մուսուլման առաջնորդ չեմ, ոչ էլ մուսուլմանների պաշտոնական ներկայացուցիչը, ես բոլոր լոնդոնցիների քաղաքապետն եմ»,- ընդգծել է նա։
«Ինտեգրումը կարևոր խնդիր է, որը դրված է իմ առջև առաջիկա տարիներին»,- նշել է նա։
