ՀՀ ԱԺ նախագահ Հովիկ Աբրահամյանը հունիսի 14-ին ընդունել է ՀՀ-ում Չեխիայի Հանրապետության գործերի ժամանակավոր հավատարմատար Պետր Միկիսկային:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ Հովիկ Աբրահամյանը շնորհավորել է Պետր Միկիսկային դիվանագիտական առաքելությունը ստանձնելու կապակցությամբ և վստահություն հայտնել, որ նրա գործունեությունը կնպաստի հայ-չեխական բարեկամական հարաբերությունների էլ ավելի զարգացմանը: ԱԺ նախագահը նշել է, որ Հայաստանը կարևորում է Չեխիայի հետ համակողմանի գործակցությունը զարգացնելը, և Պրահայում ՀՀ դեսպանության բացումը դրա լավագույն վկայությունն է:
«Վստահ ենք, որ Հայաստանում Չեխիայի դիվանագիտական ներկայացուցչության բացումը ևս դրական ազդեցություն կունենա մեր քաղաքական երկխոսության շարունակականությունն ապահովելու, առևտրատնտեսական համագործակցությունը խթանելու և մարդկային շփումներն ակտիվացնելու գործում»,-ասել է Հովիկ Աբրահամյանը: ԱԺ նախագահն անհրաժեշտ է համարել խորհրդարանական փոխգործակցության ակտիվացումը` համոզմունք հայտնելով, որ խորհրդարանների մակարդակով երկխոսությունը կարող է օգտակար լինել փոխճանաչելիության բարձրացման համար` միմյանց ներքին և արտաքին քաղաքական օրակարգի հարցերի մասին լավ պատկերացումներ կազմելու, միջազգային կազմակերպությունների խորհրդարանական վեհաժողովներում երկուստեք հետաքրքրություն ներկայացնող հարցերի վերաբերյալ միմյանց աջակցելու տեսանկյունից: Աբրահամյանն ընդգծել է առևտրատնտեսական կապերի զարգացման անհրաժեշտությունը:
ՀՀ-ում Չեխիայի Հանրապետության գործերի ժամանակավոր հավատարմատարը շնորհավորել է Հովիկ Աբրահամյանին ԱԺ նախագահ ընտրվելու կապակցությամբ և փոխանցել Չեխիայի խորհրդարանի ղեկավարի շնորհավորական ուղերձը:
Միկիսկան վստահեցրել է, որ կանի հնարավորը երկկողմ կապերը զարգացնելու և խորացնելու ուղղությամբ: Նա նույնպես կարևորել է միջխորհրդարանական կապերի ակտիվացումը և այդ համատեքստում տեղեկացրել, որ Չեխիայի խորհրդարանում ստեղծվել է չեխ-հայկական բարեկամության խումբ, իսկ սեպտեմբերին Հայաստան կժամանի Չեխիայի խորհրդարանական պատվիրակությունը:
