«Վերջերս Հայաստանի համար շատ կարևոր հայտարարությունները արվում են հանրապետության տարածքից դուրս: Նախ Ս. Սարգսյանը ռուսական ռադիոկայանին տված հարցազրույցում հայտարարում է հայ-թուրքական արձանագրություններից ստորագրությունը հետ կանչելու մասին:
Հետո սփյուռքի նախարարը Կալիֆոռնիայում ոչ պակաս կարևոր հայտարարություն է անում երկպալատ խորհրդարան ստեղծելու մասին»,- փաստում է ԼՂՀ նախկին արտգործնախարար Արման Մելիքյանը, որին մտահոգիչ է թվում, որ արտերկրում նման հայտարարություններ անելը արդեն ավանդույթ է դառնում. չէ՞ որ խոսքը կարևոր պետական որոշումների ու սահմանադրական փոփոխությունների մասին է:
«Հայ-թուրքական բանակցությունների կարգավորման գործընթացը պետք չէր սկսել, եթե արդյունքը երաշխավորված չէր: Երկրորդ հնարավոր տարբերակն այն է, որ հարաբերությունները կարգավորելու ցանկություն էլ չկար, այդ դեպքում առավել ևս կարիք չկար այս գործընթացն սկսելու»,- ասում է Ա. Մելիքյանը, ըստ որի` ստացված իրավիճակը չարժեր այն գինը, որ մենք վճարեցինք:
Բանախոսի գնահատմամբ` երկպալատ խորհրդարան ստեղծելու գաղափարը ևս առնվազն անհեթեթություն է և հերթականը այն որոշումներից, որոնք ընդունում են իշխանությունները ու հետո ընկնում խուճապի մեջ:
Ինչպես ընդունեց նաև ՀՀԿ-ական պատգամավոր Արտակ Դավթյանը, այս նախագծի իրագործման համար դեռ ոչինչ պատրաստ չէ:
«Դեռ պետք է սահմանադրական հանրաքվե անցկացվի, պիտի որոշվի` որ գաղթօջախներից են ներկայացուցիչներ լինելու վերին պալատում»:
ՀՀԿ-ական պատգամավորը ասաց նաև, թե չի կիսում այն տեսակետը, որ երկպալատ խորհրդարան ստեղծելու գաղափարը նպատակ չունի դիվիդենդներ շահել Դաշնակցության մոտ, որը այս գաղափարը առաջարկել էր վաղուց:
«Երբ խոսքը սփյուռքահայերի` ընտրություններին մասնակցելու իրավունքի մասին է, այն ժամանակ ՀՀԿ-ից ասում էին` թող գան Հայաստանում ապրեն ու մասնակցեն ընտրություններին: Ինձ համար շատ անհասկանալի է` ինչ չափանիշներով են որոշվելու` որ համայնքի ներկայացուցիչներն են իրավունք ունենալու առաջադրվելու վերին պալատի պատգամավոր:
Ուրիշ հարց, եթե սփյուռքից պաշտոնյաները մեծ գումարներ վճարեն պետբյուջե»,- ասում է Արման Մելիքյանը:
