News Georgia-ի փոխանցմամբ՝ Վրաստանի խորհրդարանն այսօր կայացող արտահերթ նիստի ժամանակ վստահություն է հայտնելու նախարարների նորացված կաբինետին: Վրաստանի Սահմանադրության համաձայն՝ եթե խորհրդարանի կողմից հաստատվելուց հետո նորացվում է կառավարության 1/3-ը, ապա խորհրդարանը վերստին պետք է հաստատի կառավարության նորացված կազմը:
Խորհրդարանի արտահերթ նիստը մեկնարկելու է տեղական ժամանակով ժամը 13.00-ին: Վրաստանի վարչապետ Նիկա Գիլաուրին խորհրդարանականներին կներկայացնի կառավարության ծրագիրն ու նախարարների կաբինետի նորացված կազմը: Այդ ամենի հաստատման համար անհրաժեշտ է 150 հոգանոց խորհրդարանի 2/3-ի աջակցությունը (100 քվե): Արդեն հայտնի է, որ ընդդիմադիր կուսակցությունները դեմ են քվեարկելու:
Խորհրդարանի կողմից վստահություն հայտնելու հարցն օրակարգ մտավ Վրաստանի կառավարությունում իրականացված կադրային վերջին փոփոխություններից հետո: 2010 թվականի հուլիսից ի վեր Վրաստանի կառավարությունում իրականացվել է կադրային 7 փոփոխություն:
Վերջին դեպքը գրանցվեց նախորդ հինգշաբթի, երբ Վրաստանի աշխատանքի, առողջապահության ու սոցիալական պաշտպանության նախարարի պաշտոնում Անդրիա Ուրաշձեին փոխարինեց Շվեյցարիայում Վրաստանի նախկին դեսպան Զուրաբ Չիաբերաշվիլին:
