Խաղաղօվկիանոսյան՝ ջրի տակ անցնող Կիրիբաթի հանրապետության ղեկավարները ծրագրում են երկրի բնակիչներին վերաբնակեցնել Ֆիջի կղզիներից մեկում: Ինչպես հաղորդում է 1news.az-ը, Կիրիբաթիի նախագահ Անոտե Տոնգը հայտարարել է, որ տվյալ պահին ինքը բանակցություններ է վարում Ֆիջիի իշխանությունների հետ՝ կղզիներից մեկը գնելու հարցի շուրջ։
Տոնգը պատմել է, որ խոսքը Ֆիջիի` մեծությամբ երկրորդ կղզու ձեռքբերման մասին է, որի մակերեսն ավելի քան հինգ հազար քառակուսի մետր է: Տվյալ պահին Կիրիբաթի բնակչությունն ավելի քան 100 հազար մարդ է: Երկրի տարածքն աստիճանաբար ջրի տակ է անցնում։ Այս մասին հաղորդում է BBC News-ը: Անոտե Տոնգը բազմիցս հայտարարել է, որ Կիրիբաթի ջրի տակ անցնելը կապված է կլիմայական փոփոխությունների հետ: Ավելի վաղ Տոնգն առաջարկել էր արհեստական կղզիներ ստեղծել իր երկրի բնակիչների համար: Ֆիջի կղզիները գտնվում են ավելի քան երկու հազար կիլոմետր հեռավորության վրա:
Ջրի տակ սուզվող հանրապետության իշխանությունները հույս ունեն, որ երբ ժամանակը գա՝ բնակչության մի մասին հնարավոր կլինի վերաբնակեցնել նաև խաղաղօվկիանոսյան տարածաշրջանի այլ երկրներ, օրինակ՝ Ավստրալիա կամ Նոր Զելանդիա:
Թե երբ կսկսվի վերաբնակեցումը, Տոնգը չի նշել:
2009 թվականին փորձագետները կանխատեսել էին, որ 21-րդ դարի վերջին օվկիանոսի մակարդակը կբարձրանա 1.1 մետրով, և այդ դեպքում Կիրիբաթը, ինչպես նաև տարածաշրջանի մի շարք այլ պետություններ մոտակա 50 տարվա ընթացքում ջրի տակ կանցնեն:
Կիրիբաթը բրիտանական նախկին գաղութներից մեկն է: Տնտեսության հիմքում կոկոսի վաճառքն է և ձկնորսությունը: Երկրի շատ բնակիչներ արտագնա աշխատանքի են մեկնում հարևան պետություններ:
