Թուրքական Аktif Haber գործակալության փոխանցմամբ՝ թուրք հրապարակախոս Էրդալ Շիմշեքն իր հոդվածում անդրադարձել է հայ-իրանական հարաբերություններին.
«Հայ-իրանական հարաբերություններին նայելիս ակնհայտ է դառնում, թե իրականում ով է գրավել ադրբեջանական հողերը: Հայաստանի և Իրանի միջև առկա է դաշնակցային ու փոխըմբռնման համաձայնագիր, ըստ որի՝ եթե կողմերից մեկը ենթարկվի հարձակման, ապա մյուս կողմը պարտավոր է օգնել նրան:
Դա նշանակում է, որ հայ-թուրքական հակամարտության դեպքում Իրանի բանակը Հայաստանի կողմում կպատերազմի իր հավատակիցների դեմ: Բացի այդ, Իրանը չի հարգում ադրբեջանական ծագում ունեցող իր միլիոնավոր քաղաքացիներին: Որտե՞ղ է իրանական իշխանության տրամաբանությունը, և ինչո՞ւ է նա վարվում նման կերպ՝ հայտնի է թերևս միայն իրեն:
Բացի այդ, Իրանն Ադրբեջանում տարածում է իր գաղափարախոսությունը՝ անելով ամեն ինչ Թուրքիայի հեղինակությունը նվազեցնելու ուղղությամբ: Ի դեպ, Հայաստանի թիվ մեկ առևտրային գործընկերը հենց Իրանն է: Կարող է զարմանալի թվալ, սակայն Իրանը հայերի ձեռքերով օկուպացրել է Ղարաբաղը»:
Հիշեցնենք, որ նախորդ տարվա մայիսի սկզբին Իրանի հոգևոր առաջնորդ Այաթոլլա Խամենեիի ներկայացուցիչ, իմամ Սեիդ Հասան Ամելին հայտարարել էր, որ պատերազմի ժամանակ Իրանը զենք է մատակարարել Ադրբեջանին.
«Ցայժմ իրանցի քաղաքական գործիչները, ելնելով դիվանագիտական նկատառումներից, չեն բարձրաձայնել Ադրբեջանին ցուցաբերած իրենց օգնության մասին և հնարավոր է` երբեք էլ չբարձրաձայնեն այդ մասին: Սակայն դա ինձ չի վերաբերում: Ես հայտարարում եմ, որ մենք ավտոշարասյուններով սպառազինություն ենք մատակարարել Շուշիի մարտերի ժամանակ սպառազինության հարցում դժվարություններ կրող ադրբեջանցիներին:
Այն ժամանակ ստեղծվել էր ադրբեջանա-իրանական պաշտպանական շտաբ, որի շրջանակներում թավրիզցի և արդաբիլցի գեներալներն օգնել են ադրբեջանցիներին: Իրանը նաև Ադրբեջանին աջակցել է հազարավոր աֆղան մոջահեդների` դեպի Ղարաբաղ փոխադրման կազմակերպչական հարցերում: Մենք զենք ու զինամթերք ենք հատկացրել Ադրբեջանին, մեր բազաները գտնվել են այնտեղ: Այսօր Ադրբեջանում կան հազարավոր վկաներ, որոնք կհաստատեն իմ այս խոսքերը: Նրանք կենդանի են, և եթե մի փոքր խիղճ ունեն, ապա կարող են հաստատել իմ ասածները»:
