Իրան-Հայաստան երկաթուղու նախագծին Հայաստանի ներգրավումը կարող է ոչ միայն տնտեսական, այլ նաև քաղաքական օգուտներ բերել մեր երկրին: «Առաջին լրատվական»-ի հետ զրույցում այս մասին ասաց փորձագետ Սարո Սարոյանը:
«Իհարկե, եթե երկաթուղին երբևէ կառուցվի, միանշանակ է՝ չի գտնվի մեկը, ով կասի, որ այն Հայաստանի համար մեծ ազդեցություն ու նշանակություն չի ունենա: Առաջին հերթին, մեր երկիրը շրջափակման մեջ է և իր 4 հարևաններից 2-ի հետ բաց սահմաններ չունի, բացի այդ, իր տնտեսական ողջ գործունեությունն իրականացնում է Իրանի ու Վրաստանի միջոցով: Վերջինի հետ կիսախարխուլ երկաթուղային ճանապարհը շատ քիչ է, որպեսզի Հայաստանը կարողանա տնտեսական հզորություններ զարգացնել: Իսկ Իրանի հետ նոր երկաթգծի կառուցման դեպքում ասիական տարածաշրջանի հետ տնտեսական գործակցությունը կավելանա»,- ասաց Սարո Սարոյանը:
Խոսելով նախագծի քաղաքական նշանակության մասին՝ փորձագետը նշեց, որ Իրան-Հայաստան երկաթուղին որոշ առումներով Հայաստանը դուրս կբերի շրջափակումից: «Թուրքիայի և Ադրբեջանի գործողություններն այս դեպքում ինչ-որ չափով կչեզոքացվեն, բացի այդ, Իրանի հետ Հայաստանի քաղաքական կապերն ավելի կսերտանան»:
Նշենք, որ աշխատանքային այցով Հայաստանում գտնվող «Ռուսական երկաթուղիներ» ընկերության նախագահ Վլադիմիր Յակունինը նշել է, որ Իրան-Հայաստան երկաթուղու շինարարության ծրագիրը իրատեսական հիմքեր ունի: Նա հավելել է, որ նոր երկաթուղու կառուցումը ենթադրում է սկզբունքորեն նոր ենթակառուցվածքներ, որոնց ծախսերը, առևտրային տեսանկյունից, արագ չեն հատուցվի` դրա համար կպահանջվի 30-ից 50 տարի:
Հատկանշական է, որ հայաստանցի և եվրոպացի փորձագետների տարբեր գնահատականներով, այս նախագիծը կարժենա 2-4 միլիարդ դոլար։
