Իլհամ Ալիևն ընդունել է Ֆրանսիայի նորանշանակ դեսպան Սոֆի Լագուտի հավատարմագրերը:
Ալիևը, հիշեցնելով Կոպենհագենում Ֆրանսիայի նախագահ Էմանուել Մակրոնի հետ իր հանդիպման մասին, հայտարարել է, որ այդ հանդիպման արդյունքում երկու երկրների միջև թյուրըմբռնումներ առաջացնող հարցերն անցյալում են մնացել:
Նա ընդգծել է երկկողմ օրակարգում նոր փուլի մեկնարկը և կարևորել, առաջին հերթին, մարդկանց և բիզնեսի ներկայացուցիչների միջև շփումների վերականգնումն ու զարգացումը, ինչպես նաև համագործակցությունը մշակութային և հումանիտար ոլորտներում:
Սոֆի Լագուտն իր հերթին հայտարարել է, որ Ադրբեջանի և Ֆրանսիայի հարաբերություններում նոր էջ է բացվում, և պատրաստակամություն է հայտնել բոլոր ջանքերը գործադրել այդ կապերը զարգացնելու համար:
Նշվել է Ադրբեջանի և Ֆրանսիայի միջև հաջողված էներգետիկ գործընկերությունը, Total ընկերության հետ երկրի համագործակցության կարևորությունը։
