Հայաստանի Ներքին գործերի նախարարի տեղակալ Արմեն Ղազարյանը, Միգրացիայի և քաղաքացիության ծառայության պետն այցելել են ֆրանսիական IN Groupe ընկերության՝ Ֆրանսիայի Դուե քաղաքում տեղակայված մասնաճյուղ։ Այս մասին հայտնում են Միգրացիայի և քաղաքացիության ծառայությունից։
IN Groupe ընկերությունը գլխավորում է Կենսաչափական համակարգի ներդրման պետություն-մասնավոր գործընկերության ծրագրի մրցույթում հաղթող ճանաչված կոնսորցիումը, որը Հայաստանում հիմնել է Հայփաս ընկերությունը՝ համաձայն պայմանագրի պահանջի։ Ընկերության գործադիր տնօրեն Ագնես Դիալոն հայկական կողմին ներկայացրել է In groupe-ի կողմից գործառույթների և կարողությունների շրջանակը, մասնավորապես՝ անձի ինքնության և վստահության ծառայությունների ուղղությամբ՝ վկայակոչելով 75 պայմանագրերը տարբեր կառավարությունների հետ, Եվրոպայում տեղակայված 20 փորձագիտական և հետազոտական կենտրոնները, 130 պետությունների կողմից կիրառված լուծումները։
Ընդունող կողմը պատմական ակնարկ է ներկայացրել այն մասին, որ 500 տարի հանդիսանում է Ֆրանսիայի կառավարության գործընկերը՝ տպագրական տեխնոլոգիաների ոլորտում՝ ժամանակին համընթաց առաջարկելով նորագույն լուծումներ՝ անձի ինքնության հաստատման և անվտանգ թվային ծառայությունների ուղղություններով, որոնք համատեղվում են էլեկտրոնային, օպտիկական և բիոմետրիկ տեխնոլոգիաների հետ։
Հայկական պատվիրակությունն այցելել է ընկերության տպագրական տեխնոլոգիաների թանգարան, ծանոթացել է ոլորտի բազմադարյա պատմական զարգացումներին։ Ցուցադրվել են հայկական այբուբենի ու գրի նմուշներ, որոնք ժամանակի ընթացքում օգտագործվել են ընկերության կողմից։
Ներքին գործերի նախարարության պատվիրակությունն ընկերության արտադրամասում հետևել է անձը հաստատող փաստաթղթերի բլանկների արտադրության ողջ գործընթացին՝ առանձին-առանձին ուսումնասիրելով աշխատանքների բոլոր բաղադրիչները։ Քննարկվել են Հայաստանում ներդրվելիք տեխնոլոգիաներն ու սարքավորումները։
Աշխատաժողովի ընթացքում անդրադարձ է կատարվել ՀՀ-ում նոր կենսաչափական համակարգի ներդրման ընթացիկ փուլին, 6 աշխատանքային խմբերի արձանագրած զարգացումներին, վերահաստատվել է ծրագրի ժամանակացույցը, պայմանավորվածություն է ձեռք բերվել հավելյալ ռեսուրսներ ներգրավելու ուղղությամբ համագործակցության շրջանակն ընդլայնելու նպատակով։
