2011 թվականի օգոստոսին, նախորդ տարվա օգոստոսի համեմատ (12-ամսյա պարբերականությամբ), ՀՀ սպառողական շուկայում արձանագրվել է 4.8% գնաճ, այդ թվում՝ պարենային ապրանքների գները աճել են 7.5%-ով, ոչ պարենային ապրանքներինը` 3%-ով, իսկ ծառայությունների սակագները աճել են 2.1%-ով. այսօր «Գնագոյացում և գնաճ` վերջին մեկ ամսվա ընթացքում» թեմայով ասուլիսի շրջանակներում ներկայացրել է ՀՀ ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը:
2011 թվականի հունվար-օգոստոսին, 2010 թվականի նույն ժամանակաշրջանի համեմատ, ՀՀ սպառողական շուկայում արձանագրվել է 8.8% գնաճ. պարենային ապրանքներ` 14.5%, ոչ պարենային` 3.1%, ծառայություններ` 4.3%: Առանձին ապրանքային խմբերից նշենք հացամթերքը, վերջին 3 ամսում նկատվել է գնի 4-8%-ի նվազում: Շարունակվում է մսամթերքի գների աճը, վերջին ամսում տավարի, ոչխարի և խոզի մսի գները աճել են համապատասխանաբար 0.4%, 4% և 11.7%-ով:
Այս տարվա օգոստոսին, նախորդ տարվա օգոստոսի համեմատ, շաքարավազի գինը աճել է 21.2%-ով, կենդանական, բուսական յուղինը՝ 21.9%-ով, ձվինը՝ 46.4%-ով, կաթնամթերքինը` 21.8%-ով, մսամթերքինը` 12.9%-ով, հացամթերքինը՝ 8.4%-ով,- անդրադառնալով առավել մեծ չափով գնաճ արձանագրած ապրանքատեսակներին` նշեց Գուրգեն Մարտիրոսյանը:
12-ամսյա կտրվածքով գնանկում է արձանագրվել 3 ապրանքային խմբերում` մրգի՝ 5.5%-ով, բանջարեղենի` 25.7%-ով, այլ ապրանքային խմբում` 0.5%-ով:
