Քաղաքագետների միության նախագահ Հմայակ Հովհաննիսյանը Լիբիայի ներքաղաքական լարված իրավիճակի և 2008 թ. սկզբին Հայաստանում ընթացող հետընտրական զարգացումների միջև նմանություններ չի տեսնում և, հետևաբար, բնական է համարում, որ հայաստանյան դեպքերին միջազգային հանրությունը չարձագանքեց այնպես, ինչպես այժմ արձագանքում է Լիբիայի դեպքերին:
«Առաջին լրատվական»-ի հետ զրույցում Հովհաննիսյանը նշեց, որ Լիբիայում այժմ քաղաքացիական պատերազմ է, և այնտեղ իրավիճակն իսկապես ողբերգական է: Քաղաքագետը նաև նկատեց, որ լիբիական դեպքերը միջազգային հանրության ուշադրությանն արժանացել են, քանի որ դրա հետևանքները տարածաշրջանի համար կարող են շատ լուրջ լինել. «Լիբիական իրադարձությունների հետևանքները Մերձավոր Արևելքի տարածաշրջանի համար այլ է, քան Հայաստանի ներքաղաքական զարգացումների հետևանքները Հարավային Կովկասի համար, քանզի Լիբիայում տեղի ունեցող պրոցեսները ուղղակիորեն կարող են ազդել ամբողջ տարածաշրջանի աշխարհաքաղաքական կարգավիճակի վրա»:
Քաղաքագետը նշեց, որ Արևմուտքի միջամտությունը հուսահատ փորձ է՝ հասնելու Լիբիայում կրքերի հանդարտեցման, ինչպես նաև Արևմուտքը այդ երկրում որոշակի խաղի կանոնների ներդրման համար ճանապարհ բացելու նպատակ ունի:
«Թեև միջազգային հանրությունը հանդես է գալիս ժողովրդավարության, մարդու իրավունքների պաշտպանության դիրքերից, սակայն իրականում կարևորում և առաջին պլան են մղում աշխարհաքաղաքական խնդիրները և իրականացնում են իրենց աշխարհաքաղաքական նպատակները: Նրանք ոչ թե մտածում են ժողովուրդների ճակատագրերի մասին, այլ տարածաշրջանների աշխարհաքաղաքական կարգավիճակի մասին։ Նրանք գլոբալ շախմատային սխեմաներից ելնելով են գործում` դիտարկելով աշխարհը որպես շախմատի խաղատախտակ, ինչպես ասում էր Ձերժինսկին»,- մանրամասնեց Հ. Հովհաննիսյանը:
