Բաքվի դատարանում 14 հայ ռազմագերիների դեմ քրեական գործով դատական նիստին ընթերցվել է մեղադրական եզրակացությունը, հայտնում է minval.az-ը։
Գեղամ Սամվելի Սերոբյանը, Հրաչ Արզումանի Ավագյանը, Արմեն Եղիազարի Բաղասյանը, Գոռ Վահրամի Գասպարյանը, Կամո Կարենի Սեֆիլյանը, Վոլոդյա Վաչագանի Հակոբյանը, Գևորգ Նորայրի Ասերտյանը, Սիսակ Գրիշայի Ենգոյանը, Ալբերտ Կոմիի Պետրոսյանը, Ռոմիկ Միսակի Սեդրակյանը, Արամ Գառնիկի Մինոսյանը, Մկրտիչ Սիմոնի Մինոսյանը, Էդգար Վաչագանի Մաթեսյանը, Յուրի Տիգրանի Կարապետյանը մեղադրվում են «ահաբեկչության» և «դիվերսիայի» համար:
Ըստ մեղադրական եզրակացության՝ «մեղադրվողներն ապօրինի կերպով զենք ու զինամթերք են ձեռք բերել և ստեղծել օրենքով չնախատեսված զինված կազմավորումներ։ Այդ անձինք նոյեմբերի 26-27-ը խախտել են Ադրբեջանի պետական սահմանը և տեղավորվել Մարտունիի շրջանի Հադրութ գյուղի հյուսիսարևմտյան մասում գտնվող անտառային գոտում։ Մեղադրյալները մինչև 2020թ. դեկտեմբերի 13-ը կատարել են այդ տարածքներում ահաբեկչական սադրանքներ, անձանց վրա հարձակումներ, իրականացրել են պայթյուններ, հրդեհներ և այլ ահաբեկչական գործողություններ՝ հասարակական անվտանգության խախտման նպատակով՝ բնակչության շրջանում խուճապ ստեղծելով:
Նրանց մեղադրանք է առաջադրվել 214 (ահաբեկչություն), 228 (զենքի և պայթուցիկ նյութերի ապօրինի ձեռքբերում, պահում), 279 (անօրինական զինված խմբավորումների ստեղծում), 318 (պետական սահմանի ապօրինի հատում) հոդվածներով:
Դատավոր Աֆղան Հաջիևը հայտարարել է, որ եթե մեղադրանքը հաստատվի դատավարության ընթացքում, ամբաստանյալները կարող են դատապարտվել 14-ից 20 տարի ժամկետով կամ ցմահ ազատազրկման:
