Թուրքիայի արտաքին գործերի նախարարությունը դատապարտել և անօրինական է համարել Հայոց ցեղասպանությունը դատապարտող Լատվիայի խորհրդարանի կողմից ընդունված հռչակագիրը: Այս մասին ասվում է գերատեսչության կայքում տեղադրված հայտարարության մեջ:
«1915-ի իրադարձությունները ցեղասպանություն ճանաչելու մասին Լատվիայի խորհրդարանի կողմից ընդունված որոշումը քաղաքական պատճառներով պատմությունը վերաշարադրելու անհիմն փորձ է: Մենք մերժում և խստորեն դատապարտում ենք այդ անօրինական որոշումը»,- հայտարարել է այդ երկրի ԱԳՆ-ն:
Նախարարությունը շեշտել է, որ «միջազգային իրավունքի տեսանկյունից 1915-ի իրադարձությունները ցեղասպանություն որակելու հիմք չկա», և լատվիացի օրենսդիրների որոշումը վկայում է այս թեմայում երկակի ստանդարտների կիրառման մասին:
«Փոխանակ թշնամանք սերմանելու որոշակի շրջանակների օրակարգին հետևելու, մենք առաջարկում ենք Լատվիայի խորհրդարանին շտկել այդ սխալը և աջակցել տարածաշրջանում, հատկապես թուրք և հայ ժողովուրդների միջև խաղաղ գոյակցությանը»,- նշել են Թուրքիայի ԱԳՆ-ից։
