Մեր իրականությունը մեզ պարտադրում է քաղաքական դաշտի վերափոխում, որովհետև այլընտրանք չկա, եթե ուզում ենք պահպանել մեր պետականությունն ու ինքնությունը: «Առաջին լրատվական»-ի հետ զրույցում այսպիսի կարծիք հայտնեց «Ժողովրդավարական համախմբում» նախաձեռնության հիմնադիր Սուրեն Պետրոսյանը:
Նրա խոսքով՝ տեղի ունեցածը ուղղակի պատերազմ և պարտություն չէր, այլ դրված է ավելի երկարաժամկետ խնդիր՝ մեր լինելիության հարցը: «Ըստ էության մենք ունենք պետական ինստիտուտների և ամբողջ պետականության քայքայման գործընթաց»,- ասաց մեր զրուցակիցը և հավելեց, որ սահմանագծման հարցում անգամ չենք տեսնում որևէ սակարկություն և հայկական օրակարգի գոնե 1 տոկոս աջակցություն. «Ես չեմ պատկերացնում, թե մարդիկ չգիտեն, որ Շուռնուխը եղել է և կա հայկական տարածք՝ սկսած ԽՍՀՄ ժամանակահատվածից մինչև այսօր»: Նա ընդգծեց, որ իշխանությունը պետք է իրականացնի էլիտայի անաչառ հավաքագրման գործընթաց. «Իսկ ընտրությունների միջոցով, համոզված եմ, էլիտա չի հավաքագրվելու: Իսկ այն մարդիկ, որոնց մենք ճանաչում ենք, վստահաբար կարող ենք ասել, որ նրանք էլիտա չեն»:
Դիտարկմանը՝ այժմ ներհայաստանյան, ներքաղաքական զարգացումներ տեղի չեն ունենում առանց Մոսկվայի «դաբրոյի», Սուրեն Պետրոսյանը պատասխանեց. «Դա իրականում եղել է միշտ: Մենք շատ ժամանակ անկախությունն ու ինքնիշխանությունը շփոթել ենք հակառուսականության հետ. աշխարհում չկա գոնե մեկ պետություն, որն ամբողջությամբ լինի ինքնիշխան: Իրականում մենք պիտի կարողանայինք ճիշտ գործընկերություն ձևավորել Ռուսաստանի Դաշնության հետ»: Ինչ վերաբերում է հունվարի 11-ին հայ-ադրբեջանական ուժերի միջև բարձր մակարդակով կայանալիք հանդիպման մասին լուրերին, մեր զրուցակիցն ասաց. «Հնարավոր չէ գնալ արդյունավետ բանակցությունների պարտված ղեկավարի միջոցով: Սա բացառված է և՛ ինստիտուցիոնալ, և՛ իրավական, և՛ բարոյահոգեբանական տեսանկյունից»:
Մանրամասն՝ տեսանյութում:
