ԱԱԾ-ն հայտարարություն տարածեց նոյմեբերի 10-ի զանգվածային անկարգությունների վերաբերյալ, որոնք տեղի ունեցան ԱԺ-ում և Կառավարության շենքում: Նշվում են քաղաքական շրջանակների անուններ: Ուշագրավ է, որ այս հաղորդագրությունը տարածվեց ԱԱԾ տնօրենի Մոսկվա կատարած այցից առաջ:
Թեմայի շուրջ «Առաջին լրատվական»-ի հետ զրույցում փաստաբան Գևորգ Դավթյանը նշեց. «Այն, որ ամեն ինչը քաղաքական է, դա հանրության աչքին էլ տեսանելի է: «Սկզբից էլ կադրերում երևում էր, թե որ քաղաքական ուժին հարողներ էին մասնակցում այդ անկարգություններին: Այստեղ քաղաքական հարցը վերածվում է իրավականի. կատարվել է հանցագործություն և պետք է խստագույնս պատժվեն:
Ինչ վերաբերում է ԱԱԾ տնօրենի այցին Մոսկվա, ես կարծում եմ, որ մեր ԱԱԾ-ն պետք է առանձին ուղով գործեր, և մենք ունենայինք բոլորովին նոր կառույց, քան այն ԱԱԾ-ն, որ ունենք: Բազմիցս ականատես եղանք այդ կառույցի ղեկավարի արագ փոփոխությունների: ԱԱԾ-ն պետք է սահմանափակի իր գործունեությունը և պետք է ստեղծել նոր կառույց, որը իրապես կներկայացնի ազգային անվտանգության շահերը ՀՀ-ում և ոչ թե անգամ քողարկված ստվեր թողնի, որ կարող է ներկայացնել այլ երկրի շահեր. հանրության շրջանում կա այդպիսի տպավորություն: Հասարակական պահանջ կա, որ ստեղծվի նոր կառույց, քանի որ ԱԱԾ-ի նկատմամբ վստահություն չկա»,- նշեց Դավթյանը:
Այսօր ՀԱՊԿ Անվտանգության խորհրդի նիստում ՏԴ նախագահ Պուտինն անդրադարձել է Հայաստանում տիրող իրավիճակին, նշել է, որ Փաշինյանի կայացրած որոշումը շատ ծանր է եղել, և որ իր թիմը սատարում է ՀՀ վարչապետին և իշխանությանը՝ եռակողմ փաստաթղթի բոլոր դրույթները կյանքի կոչելու հարցում:
Անդրադառնալով այս դիտարկմանը՝ փաստաբան Արայիկ Պապիկյանը նշեց, որ Պուտինը, ըստ էության, իրերն իրենց անուններով է կոչել: «Պուտինը ի լուր բոլորի հայտարարել է, որ ՀՀ-ն, լինելով միջազգային իրավունքի սուբյեկտ, արդեն այդպիսին չէ: Առնվազն դե ֆակտո ներքաղաքական բոլոր զարգացումները հանգուցալուծվելու են Կրեմլում: Եվ այդ մասին Պուտինը ազդակներ է ուղարկել»:
Մանրամասները՝ տեսանյութում:
