Հայաստանի գործարարների միության անդամներն օրերս հանդիպում են ունեցել Ազգային Ժողովի նախագահ Արարատ Միրզոյանի հետ: Ինչպես «Առաջին լրատվական»-ի հետ զրույցում տեղեկացրեց միության փոխնախագահ Արմեն Մարտիրոսյանը՝ հանդիպման առիթն առաջիկայում նշվելիք Գերագույն խորհրդի և Անկախության հռչակագրի 30 ամյակն է , որի հեետ կապված Գործարարների միությունը և «Ձեղնահարկ» ՀԿ-ն նախաձեռնել են տարբեր միջոցառումներ, ինչպես նաև ֆիլմի նկարահանում և շտեմարանի տպագրություն՝ Հայաստանի անկախության կայացման պատմության մասին՝ սկսած 1960-ական թթ-ից վերջացրած Սահմանադրության ընդունմամբ:
«Այս տարի մեր Գերագույն խորհրդի 30 ամյակն է, այն Խորհրդի, որը մեզ բերեց Անկախության հռչակագիր և սա չի կարող անուշադրության մատնվել: ԱԺ նախագահի հետ քննարկել ենք ինչպես այս, այնպես էլ գործարարներին հուզող մի քանի այլ հարցեր»,- փոխանցեց Արմեն Մարտիրոսյանն ու միևնույն ժամանակ հավելեց. «Գործարարներին այսօր ամենաշատը հետաքրքրում է օրենսդրական ստաբիլությունը, այսինքն՝ օրենքներն երկար ժամանակ չփոխվեն կամ փոխվելու դեպքում լինեն տեսանելի: Այս առումով առաջարկեցինք ԱԺ-ին, որ մենք ներգրավված լինենք օրենսդիր պրոցեսում՝ որպես էքսպերտներ, որովհետև գործարարները բոլոր բնագավառներում էլ ներկայացված են՝ սկսած իրավաբանականից, վերջացրած հանքաարդյունաբերությամբ: Ուստի մենք կարող ենք պատշաճ խորհրդատվություն ապահովել:
Բացի այդ՝ մեր թիմերը ՀՀ ժողովրդի մի մասն են և մենք կարող ենք ֆոկուս-խմբեր դառնալ ԱԺ-ի հանձնաժողովների համար՝ այս կամ այն նախաձեռնությունը մեր ձեռնարկությունների վրա փորձարկելու համար:
Մեր այս առաջարկը ողջունվեց և, բնականաբար, համաձայնություն տրվեց դրան»:
Մեր զրուցակիցը նշեց, որ հանդիպմանը քննարկվել է նաև ԱԺ-ի դերն ու հասարակական ընկալման մեջ այդ դերի բարձրացման հարցը՝ որպես Սահմանադրությամբ առաջնային մանդատ ունեցող ինստիտուտի:
«ԱԺ-ն այսօր պետք է իր գործողությունների մասին հանրությանը պարզաբանումներ տա, մաքսիմալ հաշվետու լինի ժողովրդի առաջ, թափանցիկ լինի և նկատի ունենա քաղաքացիների կարծիքը այս կամ այն հարցում: Մենք ասացինք, որ այս մասով ևս պատրաստ ենք համագործակցել ԱԺ-ի հետ և նրանց կողքին լինել:
Անձամբ ես, օրինակ, խոսեցի նաև դատական համակարգի մասին, որովհետև մենք պետք է համոզված լինենք, որ մեր դատարանները արդար են, ինչը, ցավոք սրտի, այդպես չէ, քանի որ այսօր 45 հանցագործ դատավոր ունենք, ովքեր ունեզրկել են Հյուսիսային պողոտայի բնակիչներին, 100-ից ավել քաղբանտարկյալ են դատել և պարտակել են մեր սպանված զինծառայողների գործերը: Հետևաբար այս հանցագործ դատավորներն որևէ կերպ մեզ չեն կարող վստահություն ներշնչել դատարանների հանդեպ: Հայաստանը չի կարող ունենալ ներդրումներ՝ մինչև դատարանները չմաքրվեն: Ես սրա վրա շեշտը դրեցի և ասացի, որ եթե պետության համար դատավորներին փոխելը թանկ պրոցես է, ապա մենք պատրաստ ենք հարկերը բարձրացնելու միջոցով կամ ինչ-որ լրացուցիչ վճարներ տալ՝ ինչպես, օրինակ հազարական դրամներ զինծառայողների ֆոնդին ենք վճարում, այս դեպքում՝ գործարարները ավելի շատ կարող են վճարել, միայն թե համոզված լինենք, որ այլևս ունենք արդար և անկաշառ դատարաններ, որոնց արդարադատությանը կարող ենք ապավինել՝ որևէ վեճ ծագելու պարագայում:
Սրանից զատ անդրադարձանք նաև հարկային և մաքսային օրենսդրական փոփոխություններին, որոնք նույնպես շատ կարևոր են գործարարների համար»,- ընդգծեց Արմեն Մարտիրոսյանը:
Ամփոփելով խոսքը՝ Մարտիրոսյանն ասաց, որ Ազգային Ժողովի նախագահի հետ պայմանավորվել են նման շփումներն ավելի ինտենսիվ դարձնել:
https://www.youtube.com/watch?v=9KTOor0MufU&feature=emb_title
