Վրաստանի իշխանությունները պայմանավորվել են «Գազպրոմ»-ի հետ՝ ներմուծվող գազի գինը մոտ 15%-ով իջեցնելու շուրջ: Այս մասին երեքշաբթի օրը լրագրողներին հաղորդել է երկրի էկոնոմիկայի նախարար Նաթիա Թուրնավան:
«Հաշվի առնելով ուժգնացող մրցակցությունը և այն, որ աշխարհում նավթամթերքի համաշխարհային գները նվազում են, մենք այսօր վերանայել ենք «Գազպրոմ»-ի հետ պայմանագիրը, ինչը կնպաստի գազի գնի նվազմանը։ Կոմերցիոն գաղտնիքը հաշվի առնելով՝ հստակ թվեր չեմ նշի, սակայն ասեմ, որ բնական գազի գինը կնվազի շուրջ 15%-ով»,- ասել է նախարարը։
2019-ի մարտին Վրաստանը և «Գազպրոմ էքսպորտ»-ը Վրաստանի տարածքով ռուսական գազի Հայաստան տարանցման վերաբերյալ նոր պայմանագիր ստորագրեցին, որը պետք է գործեր մինչև 2020 թ.-ի վերջը: Այդ ժամանակ Թուրնավան հայտարարել էր, որ համաձայնագրի համաձայն բարելավվել են առևտրային պայմանները. ավելացել է տարանցման վճարը, իսկ ռուսական գազի գինն իջեցվել է: Վրացական կողմը նաև հաղորդել էր, որ պայմանավորվել է «Գազպրոմ»-ի հետ փոքր քանակությամբ գազ գնելու շուրջ: Այդ մատակարարումների ծավալներն ու գները չեն բացահայտվել:
Վրաստան գազի հիմնական մատակարարը Ադրբեջանն է: Մինչև 2017 թ.-ի հունվարը Վրաստանը Ռուսաստանից Հայաստան տեղափոխվող գազի տարանցման համար ստանում էր բաց թողնված հումքի ընդհանուր ծավալի 10%-ը: 2017 թ.-ին դեպի Հայաստան գազի տարանցման համար վճարվել է խառը համակարգով՝ մասամբ փողով և մասամբ հումքով, իսկ 2018-ին վճարվել է միայն կանխիկ եղանակով:
