Այսօր հրավիրված Հոգաբարձուների խորհրդի նիստը տեղի չի ունեցել, քանի որ քվորում ապահովված չի եղել:
ԵՊՀ-ից տեղեկացնում են, որ նիստի առաջարկվող օրակարգում ներառված են եղել 2018-19 ուստարում «Երևանի պետական համալսարան» հիմնադրամի գործունեության հիմնական ուղղություններով կատարված աշխատանքների վերաբերյալ ռեկտորի հաշվետվության ներկայացում և 2016-2020 թթ. «Երևանի պետական համալսարան» հիմնադրամի զարգացման ռազմավարական ծրագրով 2018-19 ուստարում նախատեսված աշխատանքների կատարողականի հաստատում:
Բացի դրանից՝ առաջարկվող օրակարգում ներառված է եղել նաև «Երևանի պետական համալսարան» հիմնադրամի՝ 2019 թ. (հունվար-դեկտեմբեր) եկամուտների և ծախսերի կատարողականի մասին հաղորդում:
ԵՊՀ ՈՒԽ նախագահ Դավիթ Ափոյանը հայտարարել է, որ ուսանող անդամների բացակայությունը բողոքի նշան է՝ ուղղված «Բարձրագույն կրթության և գիտության մասին» ՀՀ օրենքի նախագծով կառավարման խորհրդի կազմում ուսանող անդամների թվի կրճատմանը:
Դավիթ Ափոյանը շեշտել է, որ ուսանողների բողոքն ուղղված չէ կոնկրետ անձի դեմ և ներողություն է խնդրել նիստին ներկա անդամներից:
ԵՊՀ հոգաբարձուների խորհրդի նախագահ Գևորգ Մուրադյանն իր կարծիքն է հայտնել բողոքի վերաբերյալ՝ այն համարելով «անարդյունավետ»:
