«Առաջին լրատվական»-ի հետ զրույցում անդրադառնալով օտարերկրացիների կողմից երեխաների ապօրինի որդեգրման դեպքերին վերաբերող աղմկահարույց քրեական գործին, որի շրջանակներում մի քանի անձանց մեղադրանք է առաջադրվել նախնական համաձայնությամբ ծնողներից երեխային ապօրինի բաժանելու համար, ՀՀ առողջապահության նախարար Արսեն Թորոսյանը նշեց. «Վստահ եմ, որ քննությունը կաշկանդված չէ՝ պարզելու այս գործի մեջ ներգրավված անձանց ամբողջ շրջանակը: Սա շատ կարևոր է դեպքերն իրենց անուններով կոչելու և իրավական գնահատական տալու համար, որպեսզի այլևս չկրկնվեն… Հանցանքը մեղսագրելիս կարևոր են բոլոր դեպքերը և բոլոր հանգամանքները: Որպես պետություն և հասարակություն՝ պետք է ամեն ինչ անենք՝ կանխարգելելու նման զարգացումները, որևէ մեկի մտքով չպետք է անցնի, որ կարելի է ինչ-որ մեկին դրդել հրաժարվել երեխայից»:
«Մենք կասկածներ ունեինք, որ երբ երեխան ծնվում է որևէ առողջական խնդրով, այդ խնդիրներն առնվազն չափազանցվում են, որպեսզի ծնողը հրաժարվի երեխայից, և որ երեխային Հայաստանում այլ ընտանիքներ չորդեգրեն, այլ միայն արտասահմանում: Եվ այդ կասկածները մեզ դրդեցին այս խնդրով զբաղվել ավելի խորությամբ, այս ամեն ինչը մոտ մեկ տարվա պատմություն ունի, պարզապես հիմա ենք նախաքննության արդյունքները տեսնում…»,- նշեց նախարարը:
Անդրադառնալով հարցին, թե արդյոք պարզ է՝ որտեղից է սկիզբ առնում այս ոճրագործության կծիկը, նախարարը նշեց. «Նախկին իշխանությունների օրոք բազմաթիվ խնդիրներ են եղել, որոնց շուրջ հանրային կոնսենսուս է եղել, օրինակ, որդեգրումների խնդիրը կար, բայց արձագանք չի եղել, կամ համակարգային կոռուպցիայի խնդիր է եղել, բայց դրանով չեն զբաղվել… Հիմա էական չէ, թե որ օղակից է բացվել կծիկը, բայց լիահույս եմ, որ այս ոճրագործության կծիկն ամբողջությամբ կբացահայտվի»:
Որդեգրումների գործընթացը հնարավո՞ր էր գաղտնի իրականացնել. այս հարցին ի պատասխան՝ Արսեն Թորոսյանը պարզաբանեց. «Արտասահմանցիների կողմից բոլոր որդեգրումները կառավարության որոշմամբ են եղել՝ արդարադատության նախարարության կողմից բերվող, իսկ ներհայաստանյան բոլոր որդեգրումները սոցապնախարարության միջոցով են եղել: Այսինքն՝ առնվազն բազմաթիվ պաշտոնյաներ տեղյակ են եղել այդ մասին: Անհրաժեշտ է գտնել մեղավոր անձանց և ապացուցել նրանց մեղադրանքը»:
Մանրամասն՝ տեսանյութում:
