Վրացական GHN լրատվական գործակալության փոխանցմամբ՝ Эхо Москвы ռադիոկայանին տված հարցազրույցում Վրաստանի նախագահ Միխեիլ Սաակաշվիլին անդրադարձել է ռուս-վրացական հարաբերություններին.
«Երբ Ռուսաստանը Վրաստանն ընկալում է միայն որպես էթնիկ միավոր, ապա դժվար է նրա հետ խոսել պետական մակարդակով։ 2006 թվականից սկսած՝ ռուս-վրացական հարաբերությունները գլորվել են դեպի ամենախոր անդունդ։
Այժմ ես կարծում եմ, որ այդ պլանում այլևս ոչինչ չի լինի։ Այսինքն՝ այժմ մեզ մոտ այնպիսի իրավիճակ է, որ միջպետական հարաբերություններ գործնականում գոյություն չունեն, քանի որ ռուսական կառավարությունը պաշտոնապես չի ճանաչում մեր կառավարությունը, մեր սահմանները, անգամ պաշտոնապես չի ճանաչում զինադադարի համաձայնագիրը՝ էլ չխոսած որևէ հնարավոր խաղաղության պայմանագրի մասին։
Ավելին՝ ռուսական իշխանությունների ներկայացուցիչները բավական լուրջ մակարդակներում դադարել են մեզ երկիր անվանելուց՝ փոխարենն անվանելով «տարածքային-էթնիկ միավոր»։ Դա խորհրդային ժամանակաշրջանի և քաջածանոթ տերմին է։
Այս պլանում Վրաստանը, բնականաբար, սկսել է շատ արագ կտրվել Ռուսաստանից։ Մյուս կողմից էլ՝ եթե նայում ես հետխորհրդային մյուս երկրներին՝ Բելառուսին կամ Միջին Ասիայի երկրներին և անգամ Ուկրաինային, որոնք խիստ կախվածության մեջ են Ռուսաստանից, ապա գոհունակություն ես զգում, որ մեզանից այլևս ոչինչ չեն կարող վերցնել. մենք ամեն ինչ կորցրել ենք, սակայն գոյատևել ենք։
Այժմ մենք դուրս ենք եկել այդ տիրույթից, և մեր անունը Ռուսաստանի հետ ավելի քիչ են շաղկապում, քան ասենք, Բալթյան ու Արևելյան Եվրոպայի երկրներինը»։
Հիշեցնենք, որ մայիսի վերջերին էլ Սաակաշվիլին հայտարարել էր, թե արդեն երեք տարի է, ինչ ինքը «քաղաքական դիակ» է Մեդվեդևի համար:
