Տավուշի մարզի ընդհանուր իրավասության դատարանում Ռաֆիկ Մելքոնյանի նախագահությամբ սկսվել է Գառնիկ Խոջայանի գործի դատական քննությունը:
Մարզի Աչաջուր գյուղի 47-ամյա բնակիչ Գառնիկ Խոջայանը մեղադրվում է իր եղբորը դիտավորյալ սպանելու համար՝ ՀՀ քրեական օրենսգրքի 104 հոդվածի 1-ին մասով:
Ըստ մեղադրանքի՝ 2013 թվականի օգոստոսի 20-ի կեսգիշերին Գառնիկն իր հայրական տանը հարբած վիճակում վիճաբանել է եղբոր՝ Հարություն Խոջայանի հետ: Վիճաբանության ժամանակ Գառնիկը փայտե աթոռով բազմաթիվ հարվածներ է հասցրել եղբոր գլխին, մարմնի տարբեր մասերն: Այնքան է խփել, որ աթոռը չի դիմացել, կոտրվել է:
Դրանից հետո Գառնիկ Խոջայանը ջարդված աթոռի ոտքով է եղբոր գլխին հարվածներ հասցրել:
Ստացած վնասվածքներից Հարություն Խոջայանը մահացել է:
Կատարած հանցագործությունը թաքցնելու համար Գառնիկը սպանված եղբոր դին թաղել է իրենց տնամերձ այգում՝ հոնի ծառի տակ:
Գառնիկ Խոջայանը կալանքի տակ է:
Գործով տուժողի իրավահաջորդը 75-ամյա Փառանձեմ Խոջայանն է:
