Երեկ ԱԺ ԲՀԿ պատգամավոր Վարդան Օսկանյանը «Կենտրոն» հեռուստաալիքին ասել է, թե մյուս շաբաթ ԲՀԿ-ն ուրախ կլինի հյուրընկալել Հայ ազգային կոնգրեսի ու «Ժառանգության» ներկայացուցիչներին: Այս հայտարարության վերաբերյալ զրուցեցինք «Ժառանգություն» կուսակցության փոխնախագահ Արմեն Մարտիրոսյանի հետ:
– Պարոն Մարտիրոսյան, «Ժառանգությունը» մյուս շաբաթ կգնա՞ հանդիպման «Բարգավաճ Հայաստանի» հետ:
– Եթե նմանատիպ հրավերք լինի, խնդիր չեմ տեսնում: Համենայնդեպս, այս պահին պարոն Հովհաննիսյանը Հայաստանում չէ: Տեղյակ եք, որ ԵԺԿ-ի ասամբլեային է մասնակցել: Կվերադառնա, էդ հարցը կքննարկենք, և պարզ կլինի:
Ցանկացած քաղաքական ուժ, ով ցանկանում է մեզ հետ խորհրդակցել, մենք միշտ բաց ենք: Այդ թվում` նաև ԲՀԿ-ի հետ պատրաստ ենք քննարկել այն խնդիրները, որոնք կան երկրի առջև, և դրանց ուղղությամբ ինչ քայլեր ենք տեսնում: «Ժառանգությունը» տևական ժամանակ միասնականության կողմնակից է եղել, և Րաֆֆի Հովհաննիսյանը ոչ մեկ անգամ է դրա մասին խոսել: Փետրվարի 18-ի իր ուղերձում ևս պարոն Հովհաննիսյանն այդ խնդրին անդրադարձ կատարեց, որ միասնական քայլերով և միասնական օրակարգով է անհրաժեշտ առաջ շարժվել:
– Չե՞ք կարծում, որ այսպիսով, Գագիկ Ծառուկյանը ընդդիմության համախմբողի, լիդերի հայտ է ներկայացնում:
– Ես կարծում եմ` լիդերի խնդիր ոչ ոք չի դրել, որին շատ դրական եմ նայում: Բոլորի համար էլ պարզ է, որ միասնական գործունեության «ճանապարհային քարտեզը», ըստ էության, համատեղ գործունեություն է ենթադրում:
– Այս փուլում համախմբողի դերում մի կուսակցություն է, որն իրեն նույնիսկ ընդդիմություն չի համարում:
– Ես չեմ լսել, որ իրենք ասեն` մենք լիդերության հայտ ենք ներկայացնում կամ առաջնորդողի: Կարծեք թե բոլորը միասնության կոչ են անում, ուստի և այդ ֆորմատում էլ առաջ են շարժվում:
– ՀԱԿ առաջնորդ Լևոն Տեր-Պետրոսյանը Գագիկ Ծառուկյանին համեմատեց Իվանիշվիլիի հետ: Համաձա՞յն եք այդ համեմատությանը:
– Կարծում եմ` Տեր-Պետրոսյանն ինքը կասի` որքանով է հիմնավորված կամ ոչ: Իսկ անձերի հետ կապված խնդիր չեմ քննարկում: Քաղաքական ուղեգծի մասին կարող եմ ասել. բոլորիս քաղաքական ուղեգիծը մեկը կարող է լինել` այն, ինչ պահանջում է ժողովուրդը: Իսկ ժողովուրդը պահանջում է արմատական իշխանափոխություն և արմատական բարեփոխումներ և երկիրը դուրս բերել այս ճգնաժամային իրավիճակից:
– Իսկ Դուք ինչպե՞ս եք պատրաստվում արմատական իշխանափոխություն ու բարեփոխումներ անել մի ուժի հետ, որ իշխանափոխության պահանջ չի ներկայացնում և ինքն իրեն ընդդիմություն չի համարում:
– Սպասենք երևի թե վերջնական միասնական օրակարգին, որովհետև բոլորը կարծես բաց են քննարկումների համար: Վերջնական որոշմանը, կարծում եմ, շատ երկար չի մնացել: Մոտակա ժամանակներս արդեն պարզ կլինի, թե քաղաքական ուժերը ինչ օրակարգով են առաջ ընթանալու:
– ՀԱԿ ներկայացուցիչներն այսօր չեն բացառում, որ Գագիկ Ծառուկյանը կարող է ինչ-որ պահի դառնալ ընդդիմության լիդեր, բուրժուադեմոկրատական հեղափոխություն անել: Նման հեռանկար Դուք տեսնո՞ւմ եք, և դա Ձեզ համար ընդունելի կլինի՞:
– Տարբեր անուններ են տալիս հեղափոխությունների, ուստիև, կարծում եմ, խնդիրը ոչ թե անունն է, այլ բովանդակությունը: Որևէ մեկն այս պահին առաջնորդության խնդիր չի դնում, և հենց դա ամենագովելին է: Յուրաքանչյուր քաղաքական ուժ ունի երկու ճանապարհ` կա՛մ լինում է իշխանություն, կա՛մ ընդդիմություն: Աշխարհի պատմությունը դա է ապացուցել, բայց էսօր որևէ բան չեմ կարող բացառել այդ առումով:
– Դուք ասացիք` քաղաքական ուժերը լինում են կամ իշխանություն կամ ընդդիմություն, հիմա ԲՀԿ-ն ի՞նչ ուժ է:
– Հայաստանի քաղաքական դաշտը շատ յուրօրինակ է, որովհետև քաղաքական դաշտը հնարավորինս ձևախեղվել է և քաղաքական ուժերն, ըստ էության, իրենց ֆունկցիաներն ամբողջությամբ չեն կարողանում իրականացնել, ուստիև իրենց պահվածքն էլ տարբեր է լինում: Եթե իրենք գտնում են, որ այլընտրանք են, ուրեմն այդպես է, բայց դասական առումով կա իշխանություն և ընդդիմություն:
– «Ժառանգությունը» հավատո՞ւմ է, որ ԲՀԿ-ի հետ կարող է փոփոխություն բերել երկրում:
– «Ժառանգությունը» կարող է ցանկացած քաղաքական ուժի հետ փոփոխություն բերել երկրում, ով ցանկանում է այդ փոփոխությունն իսկապես բերել:
